ടോക്യോ : പാരലിമ്പിക്സ് ടേബിള് ടെന്നീസില് ഇന്ത്യയ്ക്ക് വെള്ളി. ടേബിള് ടെന്നിസില് ഭവിന ബെന് പട്ടേലാണ് വെള്ളി നേടിയത്. പാരാലിമ്പിക്സ് ടേബിള് ടെന്നീസ് ഫൈനലിലെത്തുന്ന ആദ്യ ഇന്ത്യന് താരമാണ് ഭവിന. ക്ലാസ് 4 വിഭാഗം ഫൈനലില് ചൈനയുടെ ലോക ഒന്നാം നമ്പര് താരം യിങ് ഷൂവിനോടാണ് ഭവിന പരാജയപ്പെട്ടതോടെയാണ് വെള്ളി നേടിയത്. സ്കോര് 11-7,11-5, 11-6.
ടോക്കിയോ പാരാലിമ്പിക്സില് ഇന്ത്യയുടെ ആദ്യ മെഡലാണിത്. പാരാലിമ്പിക്സില് മെഡല് നേടുന്ന രണ്ടാമത്തെ ഇന്ത്യന് വനിതയെന്ന നേട്ടവും ഭവിന സ്വന്തമാക്കി. ഗുജറാത്ത് സ്വദേശിയായ ഭാവിനയുടെ ആദ്യ പാരലിമ്പിക്സാണ് ഇത്. ഇവര് ആദ്യ മത്സരത്തില് തോറ്റെങ്കിലും പിന്നീട് തുടര്ച്ചയായ നാലു ജയങ്ങള് ഫൈനലിലേക്കെത്തിക്കുകയായിരുന്നു.
ലോക രണ്ടാം നമ്പര് താരത്തെപ്പോലും അട്ടിമറിച്ചായിരുന്നു ഭവിനയുടെ മുന്നേറ്റം. ഫൈനലിലും ഭവിന മികിച്ച തുടക്കമിട്ടെങ്കിലും ചൈനീസ് താരത്തിന്റെ അനുവഭസമ്പത്തിന് മുന്നില് ഒടുവില് അടിതെറ്റി. ആദ്യ മത്സരത്തില് തോല്പ്പിച്ച ചൈനയുടെ ലോക ഒന്നാം നമ്പര് താരം യിങ് ഷൂ തന്നെ ഫൈനലിലും ഭവിനയെ തോല്പ്പിച്ചുവെന്നതും യാദൃശ്ചികതയായി.
ആദ്യ പാരാലിംപിക്സിനെത്തിയ ഭവിന ലോക ഒന്നാം നമ്പര് താരത്തോട് മാത്രമാണ് തോല്വി അറിഞ്ഞത്. ഫൈനലിലേക്കുള്ള യാത്രയില് സെമിയില് ലോക മൂന്നാം നമ്പര് താരം സാങ് മിയാവോയെയും ക്വാര്ട്ടറില് ലോക രണ്ടാം നമ്പര് താരം സെര്ബിയയുടെ ബോറിസ്ലാവാ റാങ്കോവിച്ചിനെയും ഭവിന അട്ടിമറിച്ചിരുന്നു. ബ്രസീലിന്റെ ജോയ്സ് ഡി ഒലിവേരിയയെ പരാജയപ്പെടുത്തിയാണ് പാരാലിമ്പിക് ടേബിള് ടെന്നീസ് ക്വാര്ട്ടറില് കടക്കുന്ന ആദ്യ ഇന്ത്യന് വനിത എന്ന നേട്ടം ഭാവിന സ്വന്തമാക്കിയത്.
