തിരുവനന്തപുരം: വാഹന കൈമാറ്റത്തിന് ബാങ്കുകളില് നിന്നുള്ള എന്ഒസി ഒഴിവാക്കുന്നു. ഇതിനായി ബാങ്കുകളെ ഗതാഗതവകുപ്പിന്റെ ‘വാഹന്’ വെബ്സൈറ്റുമായി ബന്ധിപ്പിക്കും.
വാഹനത്തിന്റെ ബാങ്ക് വായ്പ സംബന്ധിച്ച വിവരങ്ങള് വെബ്സൈറ്റില് ലഭിക്കും. വാഹനങ്ങള് വാങ്ങുമ്പോഴും വില്ക്കുമ്പോഴും ബാങ്കില് നിന്ന് നോ ഒബ്ജക്ഷന് സര്ട്ടിഫിക്കറ്റ് ലഭിക്കുന്നതിനും അത് ആര്ടി ഓഫീസില് സമര്പ്പിക്കാനും അപ്ലോഡ് ചെയ്യുന്നതിന് ഓണ്ലൈന് സേവനദാതാക്കളെ സമീപിക്കേണ്ടിവരുന്നതും വാഹന ഉടമകള്ക്ക് ബുദ്ധിമുട്ട് സൃഷ്ടിച്ചിരുന്നു. വാഹനത്തെ സംബന്ധിച്ച് ബാങ്ക് ഹൈപ്പോതിക്കേഷന് വിവരങ്ങളെല്ലാം ഇനി ‘വാഹന്’ സൈറ്റില് ലഭ്യമാകും. പുതിയ വാഹനങ്ങള് വാങ്ങുമ്പോഴും ബാങ്ക് ലോണിന്റെ വിവരങ്ങള് ‘വാഹന്’ സൈറ്റില് നല്കും.
മന്ത്രി ആന്റണി രാജുവിന്റെ അധ്യക്ഷതയില് സംസ്ഥാന മോട്ടോര് വാഹന വകുപ്പ്, നാഷണല് ഇന്ഫര്മാറ്റിക്സ് സെന്റര്, സംസ്ഥാന ബാങ്കേഴ്സ് സമിതി എന്നിവരുമായി നടന്ന ചര്ച്ചയിലാണ് പുതിയ തീരുമാനം. ഒരു മാസത്തിനുള്ളില് വാഹനങ്ങളുടെ വായ്പ വിവരങ്ങള് ‘വാഹന്’ വെബ്സൈറ്റില് ലഭ്യമാക്കാനുള്ള നടപടികള് പൂര്ത്തിയാക്കും.
