ന്യൂദല്ഹി : അഫ്ഗാന് വിഷയം ചര്ച്ച ചെയ്യാന് കേന്ദ്രസര്ക്കാര് സര്വകക്ഷിയോഗം വിളിച്ചു. പ്രധാനമന്ത്രിയുടെ നിര്ദേശപ്രകാരമാണ് വിദേശകാര്യമന്ത്രാലയം പാര്ലമെന്റിലെ കക്ഷി നേതാക്കളുടെ യോഗം വിളിച്ചത്. വിദേശകാര്യമന്ത്രി എസ് ജയ്ശങ്കര് ട്വിറ്ററിലൂടെയാണ് ഇക്കാര്യം വ്യക്തമാക്കിയത്.
അഫ്ഗാനിസ്ഥാനിലെ രക്ഷാദൗത്യം, അഫ്ഗാന് നയം എന്നിവ വിദേശകാര്യമന്ത്രാലയം രാഷ്ട്രീയകക്ഷി നേതാക്കളോട് യോഗത്തില് വിശദീകരിക്കും. അഫ്ഗാനിസ്ഥാന് താലിബാന് കീഴ്പ്പെടുത്തിയ സാഹചര്യത്തില് ഇനി ഇന്ത്യ എന്തു നയമാണ് തുടര്ന്ന് സ്വീകരിക്കുന്നത് എന്നത് സംബന്ധിച്ചും ചര്ച്ച നടക്കുമെന്നാണ് സൂചന.
അഫ്ഗാനിസ്ഥാനില് കുടുങ്ങിയ ഇന്ത്യാക്കാരെ തിരികെയെത്തിക്കാനുള്ള ദൗത്യം തുടരുകയാണ്. 146 പേരെ കൂടി ഇന്ത്യയിലെത്തിച്ചു. ദോഹയില് നിന്നാണ് ഇവരെ രാജ്യത്തെത്തിച്ചത്. ഇന്നലെ 392 പേരെ ദല്ഹിയില് എത്തിച്ചിരുന്നു. അഫ്ഗാനു പുറമെ, ഖത്തര്, താജികിസ്ഥാന് എന്നിവിടങ്ങളില് നിന്നാണ് ഇവരെ രാജ്യത്തെത്തിച്ചത്.
ഇവരില് ഇന്ത്യാക്കാര്ക്ക് പുറമെ, മറ്റു രാജ്യക്കാരും ഉള്പ്പെടുന്നു. നേപ്പാള്, ലെബനീസ് പൗരന്മാരെ കഴിഞ്ഞദിവസം ഇന്ത്യയിലെത്തിച്ചിരുന്നു. 500 ഓളം പേര് ഇനിയും അഫ്ഗാനില് കുടുങ്ങിക്കിടക്കുന്നതായാണ് കേന്ദ്ര വിദേശകാര്യമന്ത്രാലയം കഴിഞ്ഞദിവസം സൂചിപ്പിച്ചിരുന്നത്. കാബൂളില് നിന്ന് പ്രതിദിനം രണ്ട് ഇന്ത്യന് വിമാനങ്ങളാണ് ഒഴിപ്പിക്കല് നടത്തിവരുന്നത്.
