പെണ്ണുക്കര: പെണ്ണുക്കര കേന്ദ്രമാക്കി പ്രവർത്തിക്കുന്ന സ്വയംപ്രഭാ സ്വയം സഹായ സംഘത്തിന്റെ വസ്ത്ര ബ്രാൻഡായ ‘പെണ്ണാട’ പുറത്തിറക്കി. പെണ്ണുക്കര ഗ്രാമത്തിന്റെ സ്വന്തം വസ്ത്ര ബ്രാൻഡ് എന്ന പേരിലാണ് പെണ്ണാട പുറത്തിറക്കിയത്. 15 വയസിൽ താഴെ പ്രായമുള്ള പെൺകുട്ടികൾക്കുള്ള പട്ട് പാവാടയും ബ്ലൗസുമാണ് പെണ്ണാട.
പ്രശസ്ത ചലച്ചിത്ര താരം ബിന്ദു പണിക്കർ പെണ്ണാടയുടെ ലോഗോ പ്രകാശനവും ആദ്യ വിൽപ്പനയും നിർവഹിച്ചു. ആലാ പഞ്ചായത്തിലെ സ്വയം സഹായ സംഘങ്ങൾ ഉത്പാദിപ്പിക്കുന്ന ഉത്പന്നങ്ങളുടെ വിപണന മേളയായ ആലാ മേള 2021 ഗ്രാമപഞ്ചായത്ത് പ്രസിഡന്റ് കെ ആർ. മുരളീധരൻ പിള്ള ഉദ്ഘാടനം ചെയ്തു. പ്രാദേശിക ഉത്പന്നങ്ങളുടെ ഉപഭോഗം വർധിക്കുന്നതിലൂടെയാണ് നാട് സ്വയം പര്യാപ്തമാകുന്നതെന്ന് അദ്ദേഹം പറഞ്ഞു.
ആലാ വികസന സമിതി അധ്യക്ഷൻ പി.ബി അഭിലാഷ് കുമാർ അധ്യക്ഷനായിരുന്നു. പെണ്ണുക്കര മാർത്തോമാ പള്ളി വികാരി ഫാദർ സുശീൽ വർഗ്ഗീസ്, കൊടുകുളഞ്ഞി ശ്രീനാരായണ വിശ്വ ധർമ്മ മഠം മഠാധിപതി സ്വാമി ശിവബോധാനന്ദ, ബിജെപി ആലാ പഞ്ചായത്ത് പ്രസിഡന്റ് പി എസ് സതീഷ് കുമാർ, തുണ ചാരിറ്റബിൾ സൊസൈറ്റി എക്സിക്യൂട്ടീവ് ഡയറക്ടർ സന്ദീപ് വാചസ്പതി, ബിജെപി പഞ്ചായത്ത് ജനറൽ സെക്രട്ടറി ടി. ജി രാജേഷ്, ഗ്രാമ പഞ്ചായത്ത് അംഗങ്ങളായ ടി സി രാജീവ്, കെ കെ അനൂപ്, അനീഷാ ബിജു, ശരണ്യ പി എസ് എന്നിവർ സംസാരിച്ചു.
ആലാ വികസന സമിതിയും തുണ ചാരിറ്റബിൾ സൊസൈറ്റിയും സംയുക്തമായാണ് ആലാ മേള സംഘടിപ്പിച്ചത്. മേള വ്യാഴാഴ്ച സമാപിക്കും.
