കൊല്ലം: അഷ്ടമുടി കായലിലെ കൈയേറ്റവും മണലൂറ്റും ഗൗരവമായി എടുക്കണമെന്ന് മനുഷ്യാവകാശ കമ്മീഷനംഗം വി.കെ. ബീനാകുമാരി. അഷ്ടമുടി കായല്‍ സംരക്ഷണവുമായി ബന്ധപ്പെട്ട് മനുഷ്യാവകാശ കമ്മീഷന്‍ വിളിച്ചു ചേര്‍ത്ത യോഗത്തില്‍ സംസാരിക്കുകയായിരുന്നു അവര്‍. ആശുപത്രി മാലിന്യം കായലില്‍ തള്ളുന്നതായി പരാതിയുണ്ട്. ഇവ തടയുന്നതിന് മലിനീകരണ നിയന്ത്രണ ബോര്‍ഡ് കര്‍ശന നടപടി സ്വീകരിക്കണം.
കായലിലെ മൈക്രോ പ്ലാസ്റ്റിക്കുകള്‍ ഭക്ഷിക്കുന്ന മത്സ്യങ്ങള്‍ മനുഷ്യരിലേക്ക് ഗുരുതര രോഗങ്ങള്‍ പരത്താന്‍ സാധ്യതയുണ്ട്. കായലിനെ ആശ്രയിച്ച് ജീവിക്കുന്ന മനുഷ്യര്‍ക്ക് മലിനീകരണം വലിയ ദുരന്തങ്ങളാണുണ്ടാക്കുന്നത്. കുടിവെള്ളം അശുദ്ധമാവുകയും മത്സ്യസമ്പത്ത് നശിക്കുകയും ചെയ്യുന്നതായി കമ്മീഷനംഗം പറഞ്ഞു. അഷ്ടമുടി സംരക്ഷണം ഒരു യോഗത്തില്‍ ഒതുക്കാതെ നിരന്തര പരിശ്രമമാക്കി മാറ്റണമെന്ന് കമ്മീഷന്‍ ആവശ്യപ്പെട്ടു.
അഷ്ടമുടി കായലിലെ ജലമലിനീകരണം തടയുന്നതിന് ജനങ്ങളുടെ സഹകരണത്തോടെ ജില്ലാ ഭരണകൂടവും ബന്ധപ്പെട്ട ഉദ്യോഗസ്ഥരും ചേര്‍ന്ന് കൂട്ടായ്‌മയ്‌ക്ക് രൂപണ്ടം നല്‍കണം. ആവാസ വ്യവസ്ഥ സംരക്ഷിക്കാനുള്ള ശ്രമത്തിന് മനുഷ്യാവകാശ കമ്മീഷന്റെ സജീവമായ പിന്തുണയുണ്ടാകുമെന്നും കമ്മീഷന്‍ അംഗം വി.കെ. ബീനാകുമാരി ഉറപ്പു നല്‍കി. യോഗത്തില്‍ കായല്‍ സംരക്ഷണത്തിനായി നിരവധി നിര്‍ദേശങ്ങളുയര്‍ന്നു. ഉദ്യോഗസ്ഥര്‍ സമര്‍പ്പിച്ച നിര്‍ദേശങ്ങള്‍ കമ്മീഷന്‍ പരിശോധിച്ച ശേഷം കൂടുതല്‍ നടപടിയുണ്ടാകും.
ജില്ലാ കളക്ടര്‍, ഡപ്യൂട്ടി കളക്ടര്‍, ജില്ലാ മെഡിക്കല്‍ ഓഫീസര്‍, നഗരസഭാ സെക്രട്ടറി, അഡീഷണല്‍ പോലീസ് സൂപ്രണ്ട്, അസിസ്റ്റന്റ് കണ്‍സര്‍വേറ്റര്‍ ഓഫ് ഫോറസ്റ്റ്, തഹസില്‍ദാര്‍, ജില്ലാ പഞ്ചായത്ത് ഫിനാന്‍സ് ഓഫീസര്‍, പഞ്ചായത്ത് ഡപ്യൂട്ടി ഡയറക്ടര്‍, മലിനീകരണ നിയന്ത്രണ ബോര്‍ഡ് പരിസ്ഥിതി എഞ്ചിനീയര്‍, കെഎസ്ആര്‍ടിസിയിലെയും ബയോ ഡൈവേഴ്‌സിറ്റി ബോര്‍ഡിലെയും ഉദ്യോഗസ്ഥരും യോഗത്തില്‍ പങ്കെടുത്തു. കായല്‍ സംരക്ഷിക്കാന്‍ ശാസ്ത്രീയവും ജനകീയവുമായ പദ്ധതികള്‍ നടപ്പിലാക്കുമെന്ന് മേയര്‍ പ്രസന്ന ഏണസ്റ്റ് കഴിഞ്ഞ ദിവസം വ്യക്തമാക്കിയിരുന്നു. കായല്‍കരയിലെ വീടുകളില്‍ നിന്ന് കക്കൂസ് മാലിനണ്ട്യം പുറന്തള്ളുന്നതും മണിച്ചിത്തോട് ഓടയിലെ ഔട്‌ലെറ്റുകളുമാണ് പ്രധാന പ്രശ്‌നങ്ങളിലൊന്ന്.
സാമ്പത്തികമായി പിന്നോട്ട് നണ്ടില്‍ക്കുന്നവരെ കണ്ടെത്തി വീടുകളില്‍ കക്കൂസ് സംവിധാനം ഒരുക്കുമെന്നും മണിച്ചിത്തോടിന്റെ കായലിലേക്കുള്ള ഔട്‌ലറ്റുകള്‍ അടയ്‌ക്കുമെന്നും മേയര്‍ അറിയിച്ചു. പദ്ധതിയുമായി ബന്ധപ്പെട്ട് കോര്‍പ്പറേഷന്‍ 14ന് സാങ്കേതിക ശില്‍പ്പശാല നടത്തും.
