ചേര്ത്തല: ഏഴു വയസ്സുകാരന്റെ മരണം ആശുപത്രികളുടെ നിരുത്തരവാദസമീപനം മൂലമാണെന്നു കാട്ടി ബന്ധുക്കള് ആരോഗ്യമന്ത്രിക്കു പരാതി നല്കി. പട്ടണക്കാട് മൊഴികാട് വിനോദിന്റെ മകന് അദ്വൈത്(ഏഴ്)ആണ് തിരുവനന്തപുരം എസ്എടിയില് വെച്ച് ഒന്നിനു മരിച്ചത്. ജൂലൈ 25 മുതല് തുറവൂര് താലൂക്ക് ആശുപത്രി, ചേര്ത്തല താലൂക്ക് ഹെഡ്ക്വാര്ട്ടേഴ്സ് ആശുപത്രി, കോട്ടയം ഐസിഎച്ചിലും കാട്ടിയിട്ടും വേണ്ട ചികിത്സ നല്കാതെ അവഗണിച്ചതാണ് മരണത്തിനു കാരണമായതെന്നു കാട്ടിയാണ് ആരോഗ്യ മന്ത്രിക്കു പരാതിനല്കിയിരിക്കുന്നത്.
കോവിഡാനന്തരം ഉണ്ടാകുന്ന മിസിക് എന്ന രോഗമാണ് മരണത്തിനു കാരണമായതെന്നു തിരുവനന്തപുരം എസ്എടിയില് നിന്നും അറിയിച്ചതായി പരാതിയില് പറയുന്നുണ്ട്.രോഗ ലക്ഷണങ്ങള് കുട്ടിയില് പ്രത്യക്ഷത്തില് തന്നെ തെളിഞ്ഞിട്ടും അതുതിരിച്ചറിയാനോ ചികിത്സിക്കാനോ തയ്യാറാകാതെ മൂന്നു ആശുപത്രികളിലും അവഗണിക്കുകയായിരുന്നു.
കുട്ടി പൂര്ണമായി അവശനായിട്ടും കിടത്തി ചികിത്സ നല്കാത്ത സാഹചര്യത്തിലാണ് അവസാനം കണ്ട ചേര്ത്തലയില് നിന്നും സ്വന്തമായാണ് തിരുവനന്തപുരത്തേക്കു പോയത്. ഇവിടെ എത്തിയപ്പോള് കുട്ടി പൂര്ണമായും അവശനായിരുന്നെന്നും അപ്പോള് മാത്രമാണ് കുട്ടിയുടെ രോഗം എന്താണെന്നറിഞ്ഞു ചികിത്സകിട്ടിയത്. അപ്പോഴേക്കും നിലവഷളായിരുന്നു.ചേര്ത്തലയില് നിന്നും കുട്ടിയെ തിരുവനന്തപുരത്തെത്തിക്കാന് ആംബുലന്സ് ചോദിച്ചിട്ടുപോലും സാങ്കേതിക കാരണങ്ങള് പറഞ്ഞ് ഒഴിവാക്കിയതായും പരാതിയില് പറയുന്നു.
ജൂലൈ ആദ്യവാരത്തില് ഈ വീട്ടിലെ അദ്വൈതിനൊഴികെ എല്ലാവര്ക്കും കോവിഡ് ബാധിച്ചിരുന്നു.എന്നാല് രണ്ടുദിവസം പിന്നിട്ടപ്പോള് കുട്ടിക്കും രോഗലക്ഷണങ്ങള് ഉണ്ടായെങ്കിലും ആരോഗ്യ പ്രവര്ത്തകരോട് പരിശോധനക്കു പറഞ്ഞെങ്കിലും നിരീക്ഷണത്തിലിരിക്കാനാണ് ലഭിച്ച ഉപദേശം. കോവിഡിനെ തുടര്ന്നുണ്ടായ രോഗമാണ് മരണത്തിനു കാരണമായതെന്നും.ഇത്തരം ചികിത്സാ നിഷേധം നടത്തുന്നവര്ക്കെതിരെ ശക്തമായ നടപടികള് സ്വീകരിക്കണമെന്നും പരാതിയില് ആവശ്യപെട്ടു.
