കൊല്ലം: കേരളത്തിലെ മെഡിക്കല് വിദ്യാര്ത്ഥികളില് 100 ശതമാനം പേര്ക്കും കൊവിഡ് പ്രതിരോധ വാക്സിന് രണ്ടു ഡോസ് നല്കിയെന്ന സര്ക്കാര് അവകാശവാദം പൊളിയുന്നു. എംബിബിഎസ് പരീക്ഷകള് കഴിഞ്ഞിട്ടും കേരളത്തിലെ മെഡിക്കല് വിദ്യാര്ഥികള്ക്കിടയില് 6.8 ശതമാനം പേര്ക്ക് ഇനിയും ഒന്നാം ഡോസ് വാക്സിന് പോലും ലഭിച്ചിട്ടില്ല. നൂറു ശതമാനം വാക്സിനേഷന് നടത്തിയ ശേഷം പരീക്ഷ നടത്തിയെന്ന സര്ക്കാരിന്റെ അവകാശവാദങ്ങള് പൊളിക്കുന്നതാണിത്. മെഡിക്കല് വിദ്യാര്ഥികള്ക്കിടയില് നടത്തിയ സര്വ്വേയിലാണ് ഈ വിവരം പുറത്തുവന്നത്.
സര്ക്കാരും യൂണിവേഴ്സിറ്റിയും ഒരേ പോലെ 100 ശതമാനം വാക്സിനേഷനില് ഉറച്ചു നില്ക്കുമ്പോഴും വാക്സിന് കിട്ടാത്തവരുണ്ടെന്ന തിരിച്ചറിവില് തുടങ്ങിയതാണ് സര്വ്വേ. കഴിഞ്ഞ മാസം 19 മുതല് 28 വരെയാണ് വിവരശേഖരണം നടന്നത്. കേരളത്തിലെ എല്ലാ മെഡി. കോളേജിലെ വിദ്യാര്ഥികളെയും പങ്കെടുപ്പിച്ചാണ് സര്വ്വേ നടത്തിയതെന്ന് സര്വ്വേയ്ക്ക് നേതൃത്വം നല്കിയ ഡോ.പി.ജി. ജയസൂര്യന് പറയുന്നു. 1044 പേരാണ് സര്വ്വേയില് പങ്കെടുത്തത്. കൂടുതലായും പ്രൈവറ്റ് മെഡിക്കല് കോളേജിലെ വിദ്യാര്ഥികള്ക്കാണ് വാക്സിന് ലഭിക്കാത്തത്. കേരള യൂണിവേഴ്സിറ്റി ഓഫ് ഹെല്ത്ത് സയന്സും ഇതിന് കാര്യമായ ശ്രദ്ധ കൊടുക്കുന്നില്ലെന്നും വാക്സിനേഷന് ആരംഭിക്കേണ്ട വൈദ്യ മേഖലയില് തന്നെ ഇത്തരത്തിലുള്ള അനാസ്ഥകള് ഉണ്ടാകുന്നത് ശരിയല്ലെന്നും സര്വ്വേയില് പങ്കെടുത്ത സംഘാംഗങ്ങള് പറയുന്നു.
ഒരു ഡോസ് വാക്സിന് പോലും ലഭിക്കാത്തവരാണ് 6.8 ശതമാനം പേരും. രണ്ടാം ഡോഡ് കിട്ടാത്തവരായി 12.7 ശതമാനം പേരുമുണ്ട്. വാക്സിന് എടുത്തശേഷം 27.2 ശതമാനം പേര് രോഗബാധിതരായിട്ടുണ്ട്. 0.5% വിദ്യാര്ഥികള് വാക്സിന് എടുക്കുന്നതിനു മുമ്പും വാക്സിനെടുത്തു കഴിഞ്ഞ ശേഷവും കൊവിഡ് ബാധിതരായി. വാക്സിനേഷനെപ്പറ്റി വിദ്യാര്ഥികള്ക്കിടയിലെ മിഥ്യാധാരണകളും അലര്ജി പോലുള്ള പ്രശ്നങ്ങളും ചെറിയൊരു ശതമാനം വിദ്യാര്ഥികളെ വാക്സിനേഷനില് നിന്ന് അകറ്റി നിര്ത്തുന്നുണ്ട്, എന്നാല് സ്ലോട്ട് ലഭിക്കാതെ വാക്സിന് എടുക്കാന് സാധിക്കാത്തവരാണ് അധികവും.
മെഡിക്കല് കോളേജുകളില് വാക്സിനേഷന് പൂര്ത്തിയായി എന്നാണ് പറയുന്നതെങ്കിലും ഇത് പരീക്ഷ നടത്താനും മറ്റുമുള്ള നുണ പ്രചരണം മാത്രമാണെന്നാണ് ഇതിലൂടെ വ്യക്തമാകുന്നത്. വിവരങ്ങള് വൈസ് ചാന്സലര് ഉള്പ്പെടെയുള്ള അധികൃതര്ക്ക് അയച്ചിട്ടുണ്ടെന്നും വിദ്യാര്ത്ഥികള് പറയുന്നു. ക്ലാസുകള് തുടങ്ങിയ സാഹചര്യത്തില് വാക്സിന് എടുത്തവര്ക്കും രോഗം വരുന്നത് ഭീതി വളര്ത്തുന്നുണ്ട്.
ജന്മഭൂമി ഓണ്ലൈന്