ന്യൂദല്ഹി: രാജ്യത്തെ പരമോന്നത കായിക പുരസ്കാരമായ ഖേല് രത്ന ഇനി അറിയപ്പെടുക മേജര് ധ്യാന് ചന്ദ് ഖേല് രത്ന എന്ന പേരില്. പ്രധാനമന്ത്രി നരേന്ദ്രമോദിയാണ് വിവരം ട്വിറ്ററിലൂടെ അറിയിച്ചത്. പൗരന്മാരുടെ ദീര്ഘകാലത്തെ ആവശ്യപ്രകാരമാണ് തീരുമാനം കൈക്കൊണ്ടിരിക്കുന്നത്. മുന് പ്രധാനമന്ത്രി രാജീവ് ഗാന്ധിയുടെ പേര് ഒഴിവാക്കിയാണ് കായിക ഇതിഹാസത്തിന്റെ പേര് നല്കിയത്.
ദേശത്തിന് അഭിമാനം പകര്ന്ന നിമിഷങ്ങള്ക്കിടയില് രാജ്യത്തെ പൗരന്മാരുടെ ആവശ്യ പ്രകാരം മേജര് ധ്യാന് ചന്ദിന്റെ പേര് ഖേല് രത്ന അവര്ഡിന് നല്കുകയാണ്. പൗരന്മാരുടെ ആഗ്രഹപ്രകാരം മേജര് ധ്യാന് ചന്ദ് ഖേല് രത്ന അവാര്ഡ് എന്ന് പുനര് നാമകരണം ചെയ്യുന്നുവെന്നും മോദി ട്വീറ്റ് ചെയ്തു.
കായിക താരങ്ങളുടേയും കായിക പ്രേമികളുടേയും വളരെ കാലത്തെ ആവശ്യമായിരുന്നു ഖേല് രത്നയുടെ പേര് പുനര് നാമകരണം ചെയ്ത് ഹോക്കി ഇതിഹാസം ധ്യാന് ചന്ദിന്റെ പേരില് നല്കണമെന്നുള്ളത്. അത്തരം അഭിപ്രായങ്ങള് പരിഗണിച്ചാണ് കേന്ദ്ര സര്ക്കാര് ഇപ്പോള് തീരുമാനം കൈക്കൊണ്ടിരിക്കുന്നത്.
ഒളിമ്പിക്ക് വെങ്കല നേട്ടവുമായി പുരുഷ ഹോക്കി ടീമും മികവുറ്റ പ്രകടനം കാഴ്ചവെച്ച് വനിതാ ടീമും തിളങ്ങി നില്ക്കുന്ന സന്ദര്ഭത്തിലാണ് പ്രധാനമന്ത്രിയുടെ പ്രഖ്യാപനം എന്നതാണ് ശ്രദ്ധേയം. ഇത് ഇന്ത്യന് ഹോക്കി താരങ്ങള്ക്കുള്ള അംഗീകാരമാണ്.
