ന്യൂദല്ഹി: വനിതകളുടെ ഹോക്കിയില് ഇന്ത്യ നടത്തിയ വെങ്കല പോരാട്ടത്തെ അഭിനന്ദിച്ച് പ്രധാനമന്ത്രി നരേന്ദ്രമോദി. ടീമിലെ ഓരോ അംഗങ്ങളും ഒളിംപിക്സില് മികച്ച പ്രകടനമാണ് നടത്തിയതെന്ന് പ്രധാനമന്ത്രി ട്വീറ്റ് ചെയ്തു. അസാമാന്യ ധൈര്യവും കഴിവുമുള്ളവരാണ് ഇന്ത്യക്ക് വേണ്ടി പോരാടിയത്. തങ്ങളുടെ ഏറ്റവും മികച്ച പ്രകടനമാണ് ഓരോരുത്തരും കാഴ്ചവെച്ചത്. രാജ്യം നിങ്ങളെയോര്ത്ത് അഭിമാനിക്കുന്നുവെന്നും നരേന്ദ്രമോദി പറഞ്ഞു.
ജയവും തോല്വിയും ജീവിതത്തിന്റെ ഭാഗമാണ്, ചില പ്രയത്നങ്ങള് ചില സമയങ്ങളില് അസാധാരണമായ വിധി നമുക്ക് സമ്മാനിക്കും. ചിലതില് വിജയിക്കും, ചിലത് നഷ്ടപ്പെടും. നിങ്ങളാണ് ഞങ്ങളുടെ സമ്പത്ത്. ലോക കായിക വേദിയില് ഇന്ത്യയുടെ പേരെത്തിച്ച അഭിമാനമാണ് നിങ്ങളെന്നും പ്രധാനമന്ത്രി ഫേസ്ബുക്കില് കുറിച്ചു.
രാഷ്ട്രപതി രാം നാഥ് കോവിന്ദും വനിതകളുടെ വെങ്കല പോരാട്ടത്തെ അഭിനന്ദിച്ചു. ഇന്ത്യന് വനിത ഹോക്കി ടീം ഏറ്റവും മികച്ച പ്രകടനമാണ് നല്കിയതെന്നും ഓരോ ഇന്ത്യക്കാരന്റെയും മനസ് കീഴടക്കിയെന്നും അദ്ദേഹം പ്രശംസിച്ചു.
നിശ്ചയദാര്ഢ്യമുള്ള അത്ലറ്റുകളെന്നും ഇന്ത്യയുടെ പെണ്മക്കളെന്നുമാണ് കേന്ദ്രമന്ത്രി അനുരാഗ് ടാക്കൂര് വനിതകളെ വിശേഷിപ്പിച്ചത്. ഇനിയും മികച്ചതാക്കാന് പ്രചോദിപ്പിക്കുന്ന പാരമ്പര്യമാണിത്. നിങ്ങളാണ് ഇനി വരുന്നവര്ക്ക് വഴികാട്ടിയാകുന്നതെന്നും അനുരാഗ് ടാക്കൂര് അഭിനന്ദിച്ചു.
