കൊച്ചി : തലശ്ശേരി ഫസല്‍ വധക്കേസിലെ പ്രതികളായ കാരായി രാജനും ചന്ദ്രശേഖരന്റേയും ജാമ്യ വ്യവസ്ഥയില്‍ ഹൈക്കോടതിയുടെ ഇളവ്. മൂന്ന് മാസത്തിന് ശേഷം ഇരുവര്‍ക്കും കണ്ണൂര്‍ ജില്ലയില്‍ പ്രവേശിക്കാമെന്നും കോടതി അറിയിച്ചു. കഴിഞ്ഞ ഏഴര വര്‍ഷമായി ഇരുവര്‍ക്കും കണ്ണൂരില്‍ പ്രവേശിക്കാന്‍ അനുവദിച്ചിരുന്നില്ല.
എന്നാല്‍ ഈ മൂന്ന് മാസത്തേയ്‌ക്ക് എറണാകുളം ജില്ലവിട്ട് പോകരുതെന്നും ഹൈക്കോടതി കാരായി രാജനോടും ചന്ദ്രശേഖരനോടും നിര്‍ദ്ദേശിച്ചിട്ടുണ്ട്. കേസില്‍ തുടരന്വേഷണം നടക്കുന്ന സാഹചര്യത്തിലാണ് ഈ നിര്‍ദ്ദേശം നല്‍കിയിരിക്കുന്നത്.
2006 ഒക്ടോബര്‍ 22ന് പുലര്‍ച്ചെയാണ് എന്‍ഡിഎഫ് പ്രവര്‍ത്തകനായ ഫസല്‍ വെട്ടേറ്റ് കൊല്ലപ്പെടുന്നത്. കൊലപാതകത്തിന് പിന്നില്‍ സിപിഎം ആണെന്ന് ചൂണ്ടിക്കാട്ടി കൊല്ലപ്പെട്ട ഫസലിന്റെ ഭാര്യ കോടതിയെ സമീപിച്ചതിനെ തുടര്‍ന്ന് കേസ് സിബിഐ എറ്റെടുക്കുകയായിരുന്നു.
സിപിഎം നേതാക്കളായ കാരായി രാജനും കാരായി ചന്ദ്രശേഖരനും അടക്കമുള്ള 8 പേരെ പ്രതികളാക്കി 2012 ജൂണ്‍ 12നാണ് സിബിഐ കുറ്റപത്രം സമര്‍പ്പിച്ചത്. തുടര്‍ന്ന് ഒന്നര വര്‍ഷത്തെ ജയില്‍വാസത്തിന് ശേഷം 2013ലാണ് കാരായിമാര്‍ക്ക് കോടതി കര്‍ശന ഉപാധികളോടെ ജാമ്യം നല്‍കിയത്.
