കുമളി: മദ്യലഹരിയില് 13കാരിയെ വീട്ടില് അതിക്രമിച്ചു കയറി പീഡിപ്പിക്കാന് ശ്രമിച്ച സംഭവത്തില് ഡിവൈഎഫ്ഐക്കാരന് അറസ്റ്റില്. കുമളി അമരാവതി കാഞ്ഞിരത്തിങ്കല് വീട്ടില് മനു മനോജ് (31) ആണ് അറസ്റ്റിലായത്. വെള്ളിയാഴ്ച രാത്രി പതിനൊന്ന് മണിയോടെയായിരുന്നു സംഭവം. കുമളി ടൗണിന് സമീപം വനാതിര്ത്തിയോട് ചേര്ന്ന് താമസിക്കുന്ന വീട്ടിലെ പെണ്കുട്ടിയെയാണ് അപമാനിക്കാന് ശ്രമിച്ചത്.
രാത്രിയില് മദ്യപിച്ചെത്തിയ മനു പെണ്കുട്ടി താമസിക്കുന്ന വീടിന്റെ വാതില് തള്ളിത്തുറന്ന് അതിക്രമിച്ച് അകത്ത് കയറി. തുടര്ന്ന് കടന്നുപിടിക്കാന് ശ്രമിച്ചപ്പോള് പെണ്കുട്ടി അയല്വക്കത്തെ വീട്ടിലേക്ക് ഓടി രക്ഷപ്പെടുകയായിരുന്നു. ബഹളം കേട്ടെത്തിയ നാട്ടുകാര് മനുവിനെ പിടികൂടി പോലീസില് ഏല്പ്പിച്ചു.
പ്രതിക്കെതിരെ പോക്സോ കേസ് ചുമത്തിയതായി കുമളി പോലീസ് അറിയിച്ചു. മുമ്പും സമാനമായ കേസില് മനു പ്രതിയായിട്ടുണ്ട്. പ്രായപൂര്ത്തിയാകാത്ത പെണ്കുട്ടിയെ പീഡിപ്പിച്ച് ഗര്ഭിണിയാക്കിയ കേസില് ഇയാള് ശിക്ഷ അനുഭവിച്ചിട്ടുണ്ട്. പിന്നീട് ആ പെണ്കുട്ടിയെ തന്നെയാണ് ഇയാള് വിവാഹം കഴിച്ചത്. പ്രിന്സിപ്പല് എസ്ഐ സന്തോഷ് സജീവ്, എസ്ഐ സലീം രാജു, ഉദ്യോഗസ്ഥരായ രതീഷ്, അനില് പി.ആര്, നസീമ, ഷീജാ എന്നിവരുടെ നേത്യത്വത്തിലാണ് പ്രതിയെ അറസ്റ്റ് ചെയ്തത്. പീരുമേട് കോടതിയില് ഹാജരാക്കി റിമാന്ഡ് ചെയ്തു.
ജന്മഭൂമി ഓണ്ലൈന്