കശ്മീര്: തീവ്രവാദസംഘടനയായ ഹിസ്ബുള് മുജാഹിദ്ദീന് കമാന്ഡറെ വധിച്ച് ജമ്മു കശ്മീര് സുരക്ഷാസേനയ്ക്ക് വന് ജയം. വടക്കന് കശ്മീരിലെ ഹന്ദ്വാരയില് വെച്ചാണ് ഏറ്റമുട്ടലുണ്ടായത്. മെഹ്രാജ് ഉദ്ദീന് ഹല്വായ് എന്ന ഉബൈദാണ് കൊല്ലപ്പെട്ടതെന്ന് സേനാവൃത്തങ്ങള് അറിയിച്ചു.
കഴിഞ്ഞ കുറെ വര്ഷങ്ങളായി വടക്കന് കശ്മീരില് വളരെ സജീവമായിരുന്നു മെഹ്രാജ് ഉദ്ദീന് ഹല്വായ് എന്ന ഉബൈദ്. ഇദ്ദേഹത്തിന്റെ നേതൃത്വത്തില് ഒട്ടേറെ ആക്രമണങ്ങള് നടന്നിരുന്നു. കോവിഡ് മാനദണ്ഡം നടപ്പാക്കുന്നതിന്റെ ഭാഗമായി ഹന്ദ്വാരയില് വാഹനങ്ങള് തടഞ്ഞ് പരിശോധിക്കുന്നതിനിടയില് ഒരാള് സംശയകരമായ രീതിയില് പെരുമാറുന്നത് കണ്ട് അറസ്റ്റ് ചെയ്യുകയായിരുന്നു.
ശരീരപരിശോധനയില് ഗ്രനേഡ് കണ്ടെത്തി. ഉടന് തൊട്ടടുത്ത പൊലീസ് പോസ്റ്റില് ചോദ്യം ചെയ്യലിനായി കൊണ്ടുപോയി. ചോദ്യം ചെയ്യലിലാണ് ഇദ്ദേഹം പേര് തുറന്ന് പറഞ്ഞത്. മെഹ്റാജ് ഉദ്ദീന് ഹല്വായ് എന്ന ഉബൈദ് കുശാല് മട്ടൂ സോപോര് പ്രദേശത്തെ അബ്ദുള് ഖാലിദിന്റെ മകനാണ്.
ഉബൈദ് പറഞ്ഞതനുസരിച്ച് ചില ഒളികേന്ദ്രങ്ങളില് സിആര്പിഎഫും കരസേനയും ഹന്ദ്വാര പൊലീസും ചേര്ന്ന് തിരച്ചില് നടത്തി. ഒളികേന്ദ്രത്തിലെ ആയുധശേഖരം കണ്ടെത്താന് ശ്രമിക്കുന്നതിനിടെ ഉബൈദ് ഒളിപ്പിച്ചുവെച്ച എകെ 47 റൈഫിള് എടുത്ത് പട്ടാളത്തിന് നേരെ വെടിയുതിര്ക്കുകയായിരുന്നു. പരസ്പരമുണ്ടായ വെടിവെപ്പില് തീവ്രവാദി കൊല്ലപ്പെട്ടു.
ഒളികേന്ദ്രത്തില് നടത്തിയ പരിശോധനയില് ആയുധങ്ങള്, പവര് ബാങ്ക്, ബ്ലാങ്കറ്റ്, മരുന്നുകള്, തീവ്രവാദ ലഘുലേഖകള് എന്നിവ കണ്ടെടുത്തു. ഉബൈദ് എ പ്ലസ് പ്ലസ് വിഭാഗത്തില്പ്പെട്ട തീവ്രവാദിയാണെന്നും കണ്ടെത്തി. ജമ്മുകശ്മീരില് വിവിധ ഇടങ്ങളില് നടത്തിയ ഒട്ടേറെ പൊലീസ് സ്റ്റേഷന് ആക്രമണങ്ങള് ആസൂത്രണം ചെയ്തിരുന്നു ഉബൈദ്.
