വണ്ടിപ്പെരിയാര്‍: ചൂരക്കുളം എസ്റ്റേറ്റിലെ ആറുവയസുകാരിയെ പീഡിപ്പിച്ച് കെട്ടിത്തൂക്കി കൊന്ന കേസിലെ പ്രതിയെ തള്ളിപ്പറയാതെ സിപിഎം. അതേസമയം അര്‍ജുന്‍ കൂടുതല്‍ കുട്ടികളെ ദുരുപയോഗം ചെയ്തിട്ടുണ്ടോയെന്ന് പോലീസ് പരിശോധിക്കും. എസ്റ്റേറ്റിലെ ആളുകള്‍ക്കു മുന്നില്‍ അര്‍ജുന്‍ ശാന്തനായ ആളായിരുന്നു. കുട്ടികള്‍ക്കെല്ലാം ഇയാള്‍ വിലകൂടിയ മിഠായികള്‍ വാങ്ങി നല്‍കിയിരുന്നതായാണ് വിവരം. ഇത്തരത്തില്‍ മിഠായി നല്‍കിയാണ് മരിച്ച കുട്ടിയെ വശത്താക്കിയത്.
ഡിവൈഎഫ്ഐയുടെ സജീവ പ്രവര്‍ത്തകനായ ഇയാള്‍ സമീപ ലയങ്ങളിലെ ആണ്‍കുട്ടികളെ പാര്‍ട്ടി പരിപാടികളില്‍ പങ്കെടുപ്പിച്ചിരുന്നു. ഡിവൈഎഫ്ഐ പെരിയാര്‍ മേഖലാ കമ്മിറ്റി അംഗമായി പ്രവര്‍ത്തിച്ചിരുന്നപ്പോള്‍ നിരവധി യുവാക്കളെ പാര്‍ട്ടി പരേഡില്‍ യൂണിഫോമില്‍ പങ്കെടുപ്പിച്ചിരുന്നതും അര്‍ജുന്റെ നേതൃത്വത്തിലായിരുന്നു.
അര്‍ജുന്റേത് പാര്‍ട്ടി കുടുംബമാണ്. അച്ഛന്‍ തൊഴിലാളി യൂണിയന്‍ നേതാവായതിനാല്‍ ലയങ്ങളിലുള്ളവര്‍ക്ക് യുവാവിനോട് പ്രത്യേക സ്‌നേഹമുണ്ടായിരുന്നു. ഇതും പ്രതി ദുരുപയോഗം ചെയ്തു. ഇത്രയും നീചമായ പ്രവര്‍ത്തിചെയ്തിട്ടും പാര്‍ട്ടിയുടെ ഭാഗത്തുനിന്ന് ഇയാള്‍ക്കെതിരെ ഒരു നീക്കവുമുണ്ടായിട്ടില്ല. പ്രതിയെ തള്ളിപ്പറയാനോ പുറത്താക്കാനോ പ്രാദേശിക നേതൃത്വം തയ്യാറാകാത്തത് തൊഴിലാളി നേതാവായ അച്ഛന്റെ പിന്‍ബലം കൊണ്ടാണെന്നാണ് ആക്ഷേപം. മുമ്പ് പലവട്ടം കുട്ടിക്ക് ദേഹാസ്വാസ്ഥ്യം ഉണ്ടായിട്ടും കുട്ടിയെ പരിശോധിക്കാനോ കൗണ്‍സിലിങ് നടത്താനോ രക്ഷിതാക്കള്‍ മുതിരാത്തതും ദുരൂഹമാണ്.
ജന്മഭൂമി ഓണ്‍ലൈന്‍