പള്ളുരുത്തി: മുണ്ടംവേലിയില് തണ്ണീര്ത്തടം നികത്തല് വ്യാപകം. ചിറക്കല് റോഡ് രാമേശ്വരം ഭവനപദ്ധതി പ്രദേശത്തിനു സമീപത്തെ കണ്ടല്ക്കാടുകള് വെട്ടിനശിപ്പിച്ച ശേഷമാണ് തണ്ണീര്ത്തടം നികത്തുന്നത്. സ്വകാര്യ വ്യക്തിയുടെ നേതൃത്വത്തിലാണ് ഇത്. ഉന്നത ഉദ്യോഗസ്ഥരുടേയും രാഷ്ട്രീയ കക്ഷികളുടേയും പിന്തുണയോടെയാണ് നികത്തല് ജോലികള് നടക്കുന്നതെന്നും പരാതിയുണ്ട്. ദേശാടന പക്ഷികളുടെ ആവാസ കേന്ദ്രം കൂടിയാണ് ഈ പ്രദേശം.
ഏതാനും മാസങ്ങള്ക്കു മുന്പ് തണ്ണീര്ത്തടം മണ്ണിട്ട് നികത്താനുള്ള ശ്രമം പ്രദേശവാസികളുടെ എതിര്പ്പിനെ തുടര്ന്ന് ഉപേക്ഷിച്ചിരുന്നു. ഒരിടവേളക്കുശേഷം ഉന്നത അധികാരികളുടെ പിന്തുണയോടെയാണ് നികത്തല് ജോലികള് നടക്കുന്നതെന്നാണ് ആക്ഷേപം. കര്ഷകമോര്ച്ച ജില്ലാ സെക്രട്ടറി കെ.പി. കൃഷ്ണ ദാസ് ജില്ലാ കളക്ടര്ക്ക് പരാതി നല്കി.
