തിരുവനന്തപുരം: കള്ളക്കടത്ത് സ്വര്‍ണ്ണം തട്ടിയെടുക്കാന്‍ കരിപ്പൂര്‍ വിമാനത്താവളത്തില്‍ എത്തിയ അര്‍ജുന്‍ ആയങ്കി ഉപയോഗിച്ച ചുവന്ന സ്വിഫ്റ്റ് കാര്‍ ഡിവൈഎഫ് ഐ നേതാവിന്‍റേത്.
ഡിവൈഎഫ് ഐയുടെ ചെമ്പിലോട് നോര്‍ത്ത് വില്ലേജ് സെക്രട്ടറി സി. സജേഷിന്‍റേതാണ് ഈ കാര്‍ എന്ന് സ്ഥിരീകരിക്കപ്പെട്ടിട്ടുണ്ട്. വാര്‍ത്ത പ്രചരിച്ചതോടെ സജേഷിനെ ഡിവൈ എഫ് ഐയില്‍ നിന്നും പുറത്താക്കിയതായി ഡി വൈ എഫ് ഐ നേതാക്കള്‍ അറിയിച്ചു. ഇതോടെ സ്വര്‍ണ്ണക്കള്ളക്കടത്തും സിപിഎമ്മും തമ്മിലുള്ള ബന്ധം മറനീക്കി പുറത്തുവരികയാണ്.
കാറിന്റെ ആര്‍സി ബുക്കില്‍ സജേഷിന്റെ പേരും മേല്‍വിലാസവുമാണെന്നതിനാല്‍ അദ്ദേഹം കാര്‍ തട്ടിക്കൊണ്ടുപോയി എന്ന പരാതിയുമായി പൊലീസ് സ്റ്റേഷനെ സമീപിച്ചിരുന്നു. അര്‍ജുന്‍ ആയങ്കി തന്റെ അനുവാദമില്ലാതെ കാര്‍ തട്ടിയെടുത്ത് ഉപയോഗിച്ചു എന്ന പരാതിയാണ് സജേഷ് ഉയര്‍ത്തുന്നത്.
സജേഷിന് കാര്‍ ഉള്ളതായി നാട്ടുകാര്‍ക്ക് അറിയില്ല. ഷോറൂമില്‍ നിന്നും അര്‍ജുന്‍ കാര്‍ ഏറ്റുവാങ്ങുന്നതിന്റെ ദൃശ്യം സമൂഹമാധ്യമങ്ങളില്‍ പ്രചരിച്ചിരുന്നു. കൊയ്യോട് സര്‍വ്വീസ് സഹകരണബാങ്കില്‍ അപ്രൈസറായ സജേഷ് ഡിവൈഎഫ് ഐ അഞ്ചരക്കണ്ടി ബ്ലോക്ക് കമ്മിറ്റിയിലും സിപിഎം മൊയാരം ബ്രാഞ്ചിലും അംഗമാണ്.
