ഷിജു കുമാര് എരുമേലി
പണ്ഡിതര് സമുദായത്തിന്റെ ആചാര്യനും ഗുരുവും സാമൂഹിക പരിഷ്കര്ത്താവുമായിരുന്നു ശ്രീരാമകൃഷ്ണ പണ്ഡിതര്. കേരളത്തില് ജാതീയത അതിന്റെ പരകോടിയിലെത്തിയ കാലത്താണ് ശ്രീരാമകൃഷ്ണ പണ്ഡിതരുടെ ജനനം. 1907 ജൂണ് എട്ടിന്. എറണാകുളം മുളവുകാട് തെരുവ് പറമ്പില് അയ്യപ്പനും കടവന്ത്ര ലക്ഷ്മിയുമായിരുന്നു മാതാപിതാക്കള്.
താന് കണ്ടതും അനൂഭവിച്ചതുമായ ജീവിത ചുറ്റുപാടുകള് രാമകൃഷ്ണനെ വല്ലാതെ നോവിച്ചു കൊണ്ടിരുന്നു.
ജാതീയമായ ഉച്ചനീചത്വങ്ങള് കുട്ടിക്കാലത്ത് രാമകൃഷ്ണന്റെ മനസ്സിനെ വളരെയേറെ വേദനിപ്പിച്ചിരുന്നു. ഇതിനൊരു പ്രതിവിധിയായി വായനയും പഠനവും തുടര്ന്നു. ശ്രീരാമകൃഷ്ണ പരമഹംസനെക്കുറിച്ച് സ്വാമി വിവേകാനന്ദന് രചിച്ച ‘എന്റെ ഗുരു’ വായിക്കുകയും ആ മൂല്യങ്ങള് ജീവിതത്തില് അനുവര്ത്തിക്കുകയും ചെയ്തു.
ഇതിനിടയില് ഗാന്ധിജിയെകുറിച്ചും സ്വരാജിനെകുറിച്ചുമെല്ലാം അറിയാന് തുടങ്ങി. പിന്നീട് സ്വാതന്ത്ര്യസമരപ്രസ്ഥാനത്തിന്റെ ഭാഗമായി.
ചട്ടമ്പി സ്വാമികള്, ശ്രീനാരായണ ഗുരു, മഹാത്മാ അയ്യന്കാളി എന്നിവരുടെ പ്രവര്ത്തനങ്ങള് അദ്ദേഹത്തെ ആകര്ഷിച്ചു. ‘വിദ്യ കൊണ്ട് പ്രബുദ്ധരാകുവിന്, സംഘടന കൊണ്ട് ശക്തരാകുവിന് ‘എന്ന ശ്രീ നാരായണ ഗുരുവിന്റെ പ്രബോധനം അദ്ദേഹത്തില് ആഴത്തില് സ്വാധീനം ചെലുത്തി.
പിന്നാക്കത്തില് ഏറെ പിന്നാക്കം നില്ക്കുന്നവരും ക്ഷുരകവൃത്തി മുഖ്യതൊഴിലുമാക്കിയ ജനവിഭാഗത്തെ പണ്ഡിതര് എന്ന നാമം നല്കി അദ്ദേഹം ചരിത്രത്തിന്റെ ഭാഗമാക്കി.
ഗുരുവായൂര് സത്യഗ്രഹം, വൈക്കം സത്യഗ്രഹം, പാലിയം സമരം എന്നിവയുടെ ഭാഗമാവാനും അദ്ദേഹത്തിന് കഴിഞ്ഞു. 1948 ല് കൊച്ചി നിയമസഭയിലേക്ക് മത്സരിച്ച് പരാജയപ്പെട്ടു. സജീവ രാഷ്ട്രീയ പ്രവര്ത്തനം തന്റെ സമുദായ പ്രവര്ത്തനത്തെ ബാധിക്കുമെന്ന തിരിച്ചറിവില് അദ്ദേഹം സജീവ രാഷ്ട്രീയത്തില് നിന്ന് പിന്മാറി.
ഇന്ത്യക്ക് സ്വാതന്ത്ര്യം ലഭിച്ച ശേഷം സമുദായ സംഘടനകള് എല്ലാം പടര്ന്നു പന്തലിച്ചിരുന്നു. 1951 ഫെബ്രുവരി 5ന് ആലുവയിലുളള ടി.വി. ലക്ഷ്മണന് കുട്ടിയുടെ അദ്ധ്യക്ഷതയില് ഭദ്രദീപം കൊളുത്തി അഖില കേരള പണ്ഡിതര് മഹാജനസഭ ഉദ്ഘാടനം ചെയ്തു. സഭയുടെ ആദ്യ ജനറല് സെക്രട്ടറിയായ ശ്രീരാമകൃഷ്ണ പണ്ഡിതര് 1952 മേയ് 12 ന് സംഘടന രജിസ്റ്റര് ചെയ്തു. സഭയുടെ
സന്ദേശം’ മാസികയുടെ ആദ്യ മുഖ്യപത്രാധിപരുമായിരുന്നു അദ്ദേഹം. 1963 ജൂണ് 19ന് ശ്രീരാമകൃഷ്ണ പണ്ഡിതര് സമാധിയായി.
(അഖില കേരള പണ്ഡിതര് മഹാജനസഭ ജനറല് സെക്രട്ടറിയാണ് ലേഖകന്)
