തിരുവനന്തപുരം: കേരളത്തെ കാത്തിരിക്കുന്നത് കനത്ത നികുതി വര്ധനവെന്ന് ബജറ്റില് സൂചന. ഇപ്പോഴത്തെ സാമ്പത്തികസ്ഥിതിയില് നികുതി വര്ധനവ് അനിവാര്യമെങ്കിലും പുതിയ നികുതി നിര്ദേശങ്ങള് പ്രഖ്യാപിക്കുന്നില്ലെന്ന് പറഞ്ഞ ധനമന്ത്രി കെ.എന്. ബാലഗോപാല് നികുതി-നികുതിയേതര വരുമാനം കൂട്ടാതെ ഇനി അധികകാലം പിടിച്ചുനില്ക്കാനാവില്ല എന്നതിന് സംശയമില്ലെന്ന് പറഞ്ഞു. ചെലവ് ചുരുക്കല് നടപടികളും അനിവാര്യമായി വരും. വരുമാനം വര്ധിപ്പിക്കുന്നതും ചെലവ് ചുരുക്കുന്നതിനുമുള്ള സമഗ്രപദ്ധതി സര്ക്കാര് തയ്യാറാക്കും. അതിന്റെ പ്രാരംഭപ്രവര്ത്തനങ്ങള് തുടങ്ങിക്കഴിഞ്ഞുവെന്നും ബജറ്റ് പ്രസംഗത്തില് പറയുന്നു.
പ്രാദേശിക സര്ക്കാരുകളുടെ നികുതി-നികുതിയേതര വരുമാനത്തിന്റെ സാധ്യത വളരെ വലുതാണ്. ആ സാധ്യത അനുസരിച്ച് നിരക്കുകള് ക്രമീകരിച്ചും ചട്ടങ്ങള് ഭേദഗതിചെയ്തും അധികവരുമാനം സമാഹരിക്കുന്നതിനുള്ള ശ്രമം പ്രാവര്ത്തികമാക്കാനായിട്ടില്ല. വരുമാന വര്ധനവിനുള്ള നടപടികള് സ്വീകരിക്കാന് തയ്യാറാണെന്ന നിലപാടാണ് പ്രാദേശിക സര്ക്കാരുകള് കൈക്കൊള്ളുന്നത്. ആ നിലയ്ക്ക് ധനകാര്യ കമ്മിഷന്റെ ശുപാര്ശകള് പരിഗണിച്ച് കൊവിഡ് പ്രതിസന്ധി തരണം ചെയ്യുന്ന സന്ദര്ഭത്തില് നികുതി-നികുതിയേതര വരുമാനത്തിന്റെ കാര്യത്തില് പരിഷ്കാരങ്ങള് നടപ്പാക്കുമെന്ന് ബജറ്റില് പറയുന്നു.
ബജറ്റിലെ ഈ നിലപാട് സൂചിപ്പിക്കുന്നത് തദ്ദേശ സ്ഥാപനങ്ങള് മുഖേനയുള്ള നികുതി വര്ധനവ് കേരളം അടുത്തുതന്നെ അഭിമുഖീകരിക്കേണ്ടിവരുമെന്നാണ്. കെട്ടിട നികുതിയിലും മറ്റും ഗണ്യമായ വര്ധനവുണ്ടാകും. മറ്റ് സേവനനികുതികളും വര്ധിപ്പിക്കാനുള്ള സാധ്യതയാണ് സര്ക്കാര് തേടുന്നത്.
ജന്മഭൂമി ഓണ്ലൈന്