തിരുവനന്തപുരം: 2025 ഓടെ സംസ്ഥാനത്ത് മലമ്പനി നിവാരണം സാധ്യമാക്കുന്നതിനുള്ള പ്രവര്ത്തനങ്ങളാണ് നടന്നുകൊണ്ടിരിക്കുന്നതെന്ന് ആരോഗ്യ മന്ത്രി കെ.കെ. ശൈലജ. ഘട്ടംഘട്ടമായി ജില്ലകളില് മലമ്പനി നിവാരണം സാധ്യമാക്കിയാണ് ഇത് സാക്ഷാത്കരിക്കുന്നത്. ഇന്ന് ലോക മലമ്പനി ദിനാചരണം നടത്തും. ‘മലേറിയ നിര്മാര്ജനം ലക്ഷ്യത്തിനരികെ’ എന്നതാണ് ഈ വര്ഷത്തെ സന്ദേശം. നേരത്തെ കണ്ടുപിടിച്ചാല് മലമ്പനി ചികിത്സിച്ച് ഭേദമാക്കാം. അടുത്തുള്ള പ്രാഥമികാരോഗ്യ കേന്ദ്രങ്ങളിലോ സാമൂഹികാരോഗ്യ കേന്ദ്രങ്ങളിലോ രക്തപരിശോധന നടത്തി സൗജന്യ സമ്പൂര്ണ ചികിത്സ സ്വീകരിക്കാവുന്നതാണെന്നും മന്ത്രി വ്യക്തമാക്കി.
തദ്ദേശീയ മലമ്പനിയേക്കാള് ഇതരസംസ്ഥാനത്തില് നിന്നു വരുന്നവരിലും അവിടെ പോയി വരുന്നവരിലുമാണ് മലമ്പനി കൂടുതലായി കാണുന്നത്. അതിനാല് ഇവരില് പനിയുടെ ലക്ഷണം കാണുകയാണെങ്കില് ഉടന് തന്നെ മലമ്പനി പരിശോധനയ്ക്ക് വിധേയരാകണം. ഏതെങ്കിലും പ്രദേശത്ത് മലമ്പനി സ്ഥിരീകരിച്ചാല് ഉടന് തന്നെ ആരോഗ്യവകുപ്പ് അധികൃതര്ക്ക് റിപ്പോര്ട്ട് ചെയ്യേണ്ടതാണെന്നും മന്ത്രി അറിയിച്ചു.
അനോഫിലിസ് വിഭാഗത്തില്പ്പെട്ട ക്യൂലക്സ് കൊതുകു വഴി പകരുന്ന ഒരു രോഗമാണ് മലമ്പനി. പ്ലാസ്മോഡിയം ജനുസില്പ്പെട്ട ഏകകോശ പരാഗ ജീവികളാണ് മലമ്പനിക്ക് കാരണമാകുന്നത്. പനിയും വിറയലും തലവേദനയുമാണ് മലമ്പനിയുടെ പ്രധാന ലക്ഷണങ്ങള്.
ദിവസങ്ങളോളം പനിയും വിറയലും ആവര്ത്തിക്കുന്നത് മലമ്പനിയുടെ പ്രത്യേക ലക്ഷണമാണ്. രക്ത പരിശോധനയിലൂടെ മാത്രമേ മലമ്പനി രോഗം സ്ഥിരീകരിക്കാന് കഴിയൂ. മലമ്പനിയാണ് എന്ന് അറിയാനുള്ള റാപ്പിഡ് ടെസ്റ്റ് (ബൈവാലെന്റ് ആര്ഡിറ്റി) സംവിധാനവും നിലവിലുണ്ട്.
ജന്മഭൂമി ഓണ്ലൈന്