തിരുവനന്തപുരം : ഡോളര് കടത്ത് കേസുമായി ബന്ധപ്പെട്ട് കസ്റ്റംസ് തന്റെ സൗകര്യം ചോദിച്ചറിഞ്ഞ് എത്തിയതാണെന്ന് സ്പീക്കര് പി. ശ്രീരാമകൃഷ്ണന്. കസ്റ്റംസ് ചോദ്യം ചെയ്തെന്ന വാര്ത്തകളോട് അദ്ദേത്തിന്റെ ഓഫീസ് പുറത്തിറക്കിയ വാര്ത്താ കുറിപ്പിലാണ് ഇക്കാര്യം അറിയിച്ചിരിക്കുന്നത്.
തനിക്കെതിരെ ഉയര്ന്നിട്ടുള്ള എല്ലാ വിവാദങ്ങള്ക്കും വിശദീകരണം നല്കാന് തയ്യാറാണെന്ന് നേരത്തെ വ്യക്തമാക്കിയിട്ടുള്ളതാണ്. നിയമസഭയുടെ ഭരണഘടനാ പദവിയുടെ അന്തസ്സ് ഉയര്ത്തിപ്പിടിച്ചുകൊണ്ട് സ്പീക്കറുടെ സൗകര്യം കസ്റ്റംസ് ചോദിച്ചറിയുകയായിരുന്നു. കേസുമായി ബന്ധപ്പെട്ട് ഉദ്യോഗസ്ഥര് വിശദീകരണം തേടുകയാണ് ഉണ്ടായത്. ഇതിനുമുമ്പ് ഒരു തവണ മാത്രമാണ് നോട്ടീസ് നല്കിയിട്ടുള്ളതെന്നും ശ്രീരാമകൃഷ്ണന്റെ ഓഫീസ് അറിയിച്ചു.
അതേസമയം ഔദ്യോഗിക വസതിയില് വെച്ച് അഞ്ച് മണിക്കൂറോളം ശ്രീരാമകൃഷ്ണനെ ചോദ്യം ചെയ്തതായാണ് റിപ്പോര്ട്ടുകള് പുറത്തുവരുന്നത്. കേസില് ചോദ്യം ചെയ്യലിന് ഹാജരാകാന് ആവശ്യപ്പെട്ട് കസ്റ്റംസ് രണ്ട് തവണ നോട്ടീസ് ആവശ്യപ്പെട്ടെങ്കിലും ഹാജരായിരുന്നില്ല. ഇതിനെ തുടര്ന്ന് അന്വേഷണ സംഘം നേരിട്ടെത്തി വിശദാംശം തേടുകയായിരുന്നു. വോട്ടെടുപ്പിന് ശേഷം ഹാജരാകാമെന്നാണ് ആദ്യ സമന്സില് ശ്രീരാമകൃഷ്ണന് കസ്റ്റംസിന് മറുപടി നല്കിയത്.
ഇതോടെ സംസ്ഥാനത്തെ വോട്ടെടുപ്പ് കഴിഞ്ഞതിന് പിന്നാലെ ചോദ്യം ചെയ്യലിന് ഹാജരാകാന് ആവശ്യപ്പെട്ട് കസ്റ്റംസ് വീണ്ടും നോട്ടീസ് അയയ്ക്കുകയായിരുന്നു. എന്നാല് തനിക്ക് സുഖമില്ലെന്ന് ചൂണ്ടിക്കാട്ടി കേന്ദ്ര ഏജന്സിക്ക് മുമ്പാകെ ഹാജരാകുന്നതില് നിന്നും സ്പീക്കര് ഒഴിഞ്ഞുമാറുകയായിരുന്നു. ഇതിനെ തുടര്ന്നാണ് അന്വേഷണ ഉദ്യോഗസ്ഥര് സ്പീക്കറുടെ വസതിയില് നേരിട്ടെത്തിയത്.
