തിരുവനന്തപുരം: കേന്ദ്ര ആഭ്യന്തരമന്ത്രി അമിത് ഷാ നാളെ അനന്തപുരിയില്. ബിജെപി സംസ്ഥാന പ്രസിഡന്റ് കെ. സുരേന്ദ്രന് നയിക്കുന്ന വിജയ യാത്രയുടെ സമാപനസമ്മേളനം ഉത്ഘാടനം ചെയ്യാനാണ് അദ്ദേഹം കേരളത്തിലെത്തുന്നത്.നാളെ വൈകിട്ട് 6.30ന് പ്രത്യേക വിമാനത്തില് തിരുവനന്തപുരം വിമാനത്താവളത്തിലെത്തുന്ന കേന്ദ്ര ആഭ്യന്തരമന്ത്രി അമിത് ഷാ ഏഴിന് രാവിലെ റോഡു മാര്ഗം കന്യാകുമാരിയിലേക്ക് പോകും. കന്യാകുമാരി ലോക്സഭാ മണ്ഡലത്തിലെ ഉപതെരഞ്ഞെടുപ്പ് പ്രചാരണ പരിപാടികളിലും തമിഴ്നാട് നിയമസഭാ തെരഞ്ഞെടുപ്പ് പ്രചാരണത്തിലും അദ്ദേഹം പങ്കെടുക്കും. ഉച്ച തിരിഞ്ഞ് 3.50ന് തിരുവനന്തപുരത്ത് മടങ്ങിയെത്തി ബിജെപി കോര് കമ്മിറ്റി യോഗത്തിലും തുടര്ന്ന് ശ്രീരാമകൃഷ്ണ മഠത്തില് നടക്കുന്ന സന്ന്യാസി സംഗമത്തിലും അദ്ദേഹം പങ്കെടുക്കും.
വൈകിട്ട് 5.30ന് ശംഖുംമുഖം കടപ്പുറത്ത് നടക്കുന്ന വിജയയാത്രയുടെ സമാപനസമ്മേളനം അദ്ദേഹം ഉദ്ഘാടനം ചെയ്യും. ബിജെപി ജില്ലാ പ്രസിഡന്റ് അഡ്വ. വി.വി. രാജേഷ് അദ്ധ്യക്ഷത വഹിക്കും. കേന്ദ്ര ആഭ്യന്തരമന്ത്രി ആയശേഷം ആദ്യമായാണ് അമിത് ഷാ തിരുവനന്തപുരത്ത് എത്തുന്നത്. സിറ്റി പോലീസ് കമ്മീഷണര് ബല്റാം കുമാര് ഉപാദ്ധ്യായയുടെ നേതൃത്വത്തില് പഴുതടച്ച സുരക്ഷയാണ് കേന്ദ്ര ആഭ്യന്തരമന്ത്രിക്കായി ജില്ലയില് ഒരുക്കിയിരിക്കുന്നത്.
കേന്ദ്ര പാര്ലമെന്ററികാര്യ മന്ത്രി പ്രഹ്ലാദ് ജോഷി, കേന്ദ്ര വിദേശകാര്യ സഹമന്ത്രി വി. മുരളീധരന്, കര്ണാടക ഉപമുഖ്യമന്ത്രി അശ്വഥ് നാരായണ്, ബിജെപിയുടെ സംഘടനാ ചുമതലയുള്ള ജനറല് സെക്രട്ടറി ബി.എല്. സന്തോഷ്, കേരള പ്രഭാരി സി.പി. രാധാകൃഷ്ണന്, കര്ണാടക ചീഫ് വിപ്പ് സുനില്കുമാര് എംഎല്എ, സുരേഷ് ഗോപി എംപി, ഒ. രാജഗോപാല് എംഎല്എ, ബിജെപി ദേശീയ നിര്വാഹകസമിതി അംഗം പി.കെ. കൃഷ്ണദാസ്, സംസ്ഥാന ജനറല്സെക്രട്ടറിമാരായ എം. ഗണേശ്, എം.ടി. രമേശ്, ജോര്ജ് കുര്യന്, സി. കൃഷ്ണകുമാര്, അഡ്വ. പി. സുധീര്, വൈസ് പ്രസിഡന്റുമാരായ ശോഭ സുരേന്ദ്രന്, പ്രൊഫ. വി.ടി. രമ, മഹിളാ മോര്ച്ച സംസ്ഥാന പ്രസിഡന്റ് അഡ്വ. നിവേദിത സുബ്രഹ്മണ്യന്, പ്രഫുല് കൃഷ്ണന് തുടങ്ങിയവര് പങ്കെടുക്കും.
