ന്യൂദല്‍ഹി: ടെലികോം മേഖലയെ സ്വയംപര്യാപ്തമാക്കാന്‍ 12,000 കോടി രൂപയുടെ വമ്പന്‍ പദ്ധതിയുമായി കേന്ദ്ര സര്‍ക്കാര്‍. അഞ്ചു വര്‍ഷം കൊണ്ട് മൊബൈലുകള്‍ അടക്കം രണ്ടര ലക്ഷം കോടി രൂപയുടെ ടെലികോം ഉപകരണങ്ങള്‍ നിര്‍മിക്കുകയാണ് പദ്ധതിയുടെ ലക്ഷ്യം. ഈ മേഖലയില്‍, ഉല്‍പാദനം അടിസ്ഥാനമാക്കിയുള്ള ആനുകൂല്യങ്ങള്‍ നല്‍കാന്‍ 12,195 കോടിയുടെ പദ്ധതിക്ക് കേന്ദ്ര മന്ത്രിസഭ അനുമതി നല്‍കി.
ഉപകരണങ്ങളുടെയും ഘടക ഭാഗങ്ങളുടെയും ആഭ്യന്തര ഉല്‍പാദനം കുത്തനെ വര്‍ധിപ്പിക്കുകയാണ് പദ്ധതിയുടെ ലക്ഷ്യമെന്ന് മന്ത്രിസഭാ യോഗ തീരുമാനം വിശദീകരിച്ച് കേന്ദ്ര വാര്‍ത്താ വിനിമയ മന്ത്രി രവിശങ്കര്‍ പ്രസാദ് അറിയിച്ചു. പദ്ധതി ഏപ്രില്‍ ഒന്നു മുതല്‍ നടപ്പാക്കും. ഇന്ത്യയെ ടെലികോം ഉപകരണങ്ങളുടെ ഉല്‍പാദന കേന്ദ്രമാക്കുകയാണ് ഉദ്ദേശ്യം.
സംപ്രേഷണങ്ങള്‍ക്കുള്ള ഉപകരണങ്ങളും ഫോര്‍ ജി, ഫൈവ് ജി, റേഡിയോ, നെറ്റ്‌വര്‍ക്ക് ഉപകരണങ്ങളും വയര്‍ലസ് ഉപകരണങ്ങളും ആഭ്യന്തരമായി ഉല്‍പാദിപ്പിക്കുന്നതിനാണ് ഊന്നല്‍. പദ്ധതി ആത്മ നിര്‍ഭര്‍ ഭാരതിന് കുതിപ്പ് പകരും. ഇതോടെ, മൊബൈല്‍ ഉല്‍പാദന രംഗത്ത് അടുത്ത വര്‍ഷത്തോടെ ഒരു ലക്ഷം പ്രത്യക്ഷ തൊഴിലവസരങ്ങളും മൂന്നു ലക്ഷം പരോക്ഷ തൊഴിലവസരങ്ങളും ലഭിക്കും, കേന്ദ്ര മന്ത്രി പറഞ്ഞു.
പ്രതികരിക്കാൻ ഇവിടെ എഴുതുക: