ന്യൂദല്ഹി : കോവിഡ് മഹാമാരിയെ പ്രതിരോധിക്കുന്നതിനായി രാജ്യം പിപിഇ കിറ്റുകള് നിര്മിക്കുമ്പോള് ചിലര് ഇന്ത്യയ്ക്കെതിരെ ടൂള് കിറ്റുകള് നിര്മിക്കുകയാണെന്ന രൂക്ഷ വിമര്ശനം കേന്ദ്രമന്ത്രി ഗജേന്ദ്ര സിങ് ശിഖാവത്ത്. രാജത്തിനെതിരെ ടൂള്കിറ്റ് നിര്മിച്ച് പ്രചരിപ്പിച്ചതില് ബെംഗളൂരുവില് നിന്നും ആക്ടിവിസ്റ്റ് ദിശ രവി അറസ്റ്റിലായതിന്റെ പശ്ചാത്തലത്തില് സംസാരിക്കുകയായിരുന്നു അദ്ദേഹം.
ലോകരാഷ്ട്രങ്ങളെ തന്നെ പ്രതിസന്ധിയില് ആക്കിയ കോവിഡിനെതിരെ ഇന്ത്യ ശക്തമായ പ്രവര്ത്തനങ്ങളാണ് കാഴ്ചവെച്ചിട്ടുള്ളത്. ഇതിന്റെ ഭാഗമായി ഇന്ത്യ പിപിഇ കിറ്റുകള് നിര്മിച്ച് ലോകരാഷ്ട്രങ്ങള്ക്ക് വിതരണം ചെയ്തിരുന്നു. എന്നാല് ഇത്തരത്തിലുള്ള ആളുകള് ഇന്ത്യന് ജനതയ്ക്കെതിരെ ടൂള് കിറ്റ് ഉണ്ടാക്കുന്നു. ഇവരുടെ പ്രവര്ത്തി അപമാനം ഉളവാക്കുന്നതാണെന്നും ശിഖാവത് അറിയിച്ചു.
ദിഷയുടെ അറസ്റ്റില് പ്രതിഷേധിച്ച ആക്ടിവിസ്റ്റുകളേയും പ്രതിപക്ഷത്തെയും അദ്ദേഹം രൂക്ഷമായി വിമര്ശിച്ചു. പ്രായം ഒരു മാനദണ്ഡമാണെങ്കില് 21ാം വയസ്സില് വീരമൃത്യുവരിച്ച രണ്ടാമത്തെ പരംവീര് ചക്ര നേടിയ ലഫ്. അരുണ് ഖേത്രപാലിനെ ഓര്ത്താണ് താന് അഭിമാനിക്കുന്നത്. അല്ലാതെ രാജ്യത്തെ തകര്ക്കാനായി ടൂള് കിറ്റുണ്ടാക്കിയവരെ ഓര്ത്തല്ലെന്നും അദ്ദേഹം മറ്റൊരു ട്വീറ്റിലുടെ അറിയിച്ചു.
ടൂള് കിറ്റ് പ്രചാരണത്തില് പങ്കുണ്ടെന്ന് സംശയിക്കുന്ന നിഖിത ജേക്കബ്, എഞ്ചിനീയറായ ശാന്തനു എന്നിവര്ക്കെതിരെ ജാമ്യമില്ലാ വാറണ്ടുകളും പുറപ്പെടുവിച്ചു. നിലവില് ഇവര് സംഭവത്തിന് ശേഷം ഒളിവിലാണ്. റിപ്പബ്ലിക് ദിനത്തിന് 15 ദിവസം മുമ്പ് ജനുവരി 11ന് പ്രോ ഖാലിസ്ഥാന് സംഘം സംഘടിപ്പിച്ച ഓണ്ലൈന് മീറ്റിങ്ങില് ഇരുവരും പങ്കെടുത്തതായും സൈബര് പോലീസ് ജോയിന്റ് കമ്മിഷണര് വാര്ത്താ സമ്മേളനത്തില് അറിയിച്ചു.
