ആലപ്പുഴ: എല്ലാ തീവ്രവാദ, ഭീകര വാദ പ്രസ്ഥാനങ്ങളും സിപിഎമ്മിനൊപ്പമാണെന്ന് ബിജെപി സംസ്ഥാന ഉപാധ്യക്ഷന്‍ എ.എന്‍.രാധാകൃഷ്ണന്‍. ഇടതുസര്‍ക്കാരിന്റെ ജനവിരുദ്ധ നയങ്ങള്‍ക്കെതിരെ ബിജെപി ജില്ലാ കമ്മറ്റി നടത്തിയ കളക്‌ട്രേറ്റ് മാര്‍ച്ച് ഉത്ഘാടനം ചെയ്തു സംസാരിക്കുകയായിരുന്നു അദ്ദേഹം.
കേന്ദ്രം നല്‍കുന്ന പദ്ധതികള്‍ സ്വന്തം പേരിലാക്കി മാറ്റി ജനങ്ങളെത്തിക്കുന്ന പോസ്റ്റ് മാന്റെ പണിയാണ് മുഖ്യമന്ത്രി ചെയ്യുന്നത്. കേന്ദ്രം കേരളത്തിലേക്ക് ദേശീയപാത വികസനത്തിന് കഴിഞ്ഞ ദിവസം അനുവദിച്ചത് 65000 കോടി രൂപയാണ്, നാളെ അതും തങ്ങളുടെ കഴിവുകൊണ്ടാണ് കിട്ടിയതെന്ന് ഇവര്‍ പറയും.
സമസ്തമേഖലകളിലും പിന്‍വാതില്‍ നിയമനവും അഴിമതിയുമാണ് കേരളത്തില്‍ നടക്കുന്നത്. പിഎസ്‌സിയും എംപ്ലോയ്മെന്റ് എക്‌സ്‌ചേഞ്ചും നോക്കുകുത്തികളായി മാറി. ഡിവൈഎഫിഐഐക്കാരന്റെ ഭാര്യയായാല്‍ മാത്രം സര്‍ക്കാര്‍ ജോലി എന്ന അവസ്ഥയിലേക്ക് കേരളം മാറി. കൊറോണ പ്രതിരോധം അമ്പേ പരാജയപെട്ടെന്നും അദ്ദേഹം പറഞ്ഞു. ജില്ലാ പ്രസിഡന്റ് എം.വി. ഗോപകുമാര്‍ അദ്ധ്യക്ഷനായി.
പ്രതികരിക്കാൻ ഇവിടെ എഴുതുക: