തിരുവനന്തപുരം: സംസ്കൃത സര്വ്വകലാശാലയില് എം.ബി. രാജേഷിന്റെ ഭാര്യയ്ക്ക് മലയാളം അസിസ്റ്റന്റ് പ്രൊഫസറായി പ്രവേശനം ലഭ്യമാക്കാന് സഹായിച്ചത് ഇന്റര്വ്യൂ ബോര്ഡിലുണ്ടായിരുന്ന രണ്ട് ഹിന്ദി അധ്യാപകരുടെ അധികമാര്ക്കിന്റെ അടിസ്ഥാനത്തിലെന്ന് പരാതി.
ഇന്റര്വ്യൂ ബോര്ഡില് ഉണ്ടായിരുന്ന മലയാളം വിദഗ്ധരായ മൂന്ന് പേരും നിനിതയേക്കാള് കൂടുതല് മാര്ക്ക് മറ്റ് വിദ്യാര്ത്ഥിനിക്ക് നല്കിയതായി പറയുന്നു. പക്ഷെ ബോര്ഡിലുണ്ടായിരുന്നു ഹിന്ദി അധ്യാപകര് കൂടുതല് മാര്ക്ക് നല്കിയതോടെ നിനിത ലിസ്റ്റില് മുന്നിലേക്ക് വന്നു. സേവ് യൂണിവേഴ്സിറ്റി കാമ്പയിന് കമ്മിറ്റിയാണ് ഈ പരാതി ഉന്നയിക്കുന്നത്.
മാത്രമല്ല, റാങ്ക് പട്ടികയിലെ തിരിമറി വിസിയെ മാറ്റിനിര്ത്തി അന്വേഷിക്കാനും സേവ് യൂണിവേഴ്സിറ്റി കാമ്പയിന് കമ്മിറ്റി ആവശ്യപ്പെട്ടു. ഇന്റര്വ്യൂ ബോര്ഡില് ആകെ ഏഴംഗങ്ങളാണുണ്ടായിരുന്നത്. മലയാളം വകുപ്പുമേധാവിയും ചാന്സലറുടെ നോമിനിയും ഡീനുമാണ് നിനിതയെ പിന്തുണച്ച മറ്റുള്ളവരെന്നും സേവ് യൂണിവേഴ്സിറ്റി കാമ്പയിന് കമ്മിറ്റി ആരോപിക്കുന്നു. ഇന്റര്വ്യൂ ബോര്ഡില് ഉണ്ടായിരുന്നെങ്കിലും വിസി മാര്ക്ക് ഇട്ടിട്ടില്ല. മലയാളം അസിസ്റ്ററന്റ് പ്രൊഫസറുടെ യോഗ്യത നിശ്ചയിക്കാന് മലയാളം അധ്യാപകരാണോ അതോ ഹിന്ദി വിദഗ്ധരാണോ കൂടുതല് യോഗ്യരെന്ന് സേവ് യൂണിവേഴ്സിറ്റി കാമ്പയിന് കമ്മിറ്റി ചെയര്മാന് ആര്.എസ്. ശശികുമാറും സെക്രട്ടറി എം. ഷാജര്ഖാനും ചോദിച്ചു.
പുറത്തുനിന്നെത്തിയ മലയാളം ഭാഷാവിദഗ്ധരേക്കാള് കൂടുതല് മാര്ക്ക് സംസ്കൃത സര്വ്വകലാശാലയിലെ രണ്ട് ഹിന്ദി അധ്യാപകരെക്കൊണ്ട് കൊടുപ്പിച്ചാണ് നിനിതയെ തിരഞ്ഞെടുക്കാന് യോഗ്യയാക്കിയതെന്ന് സേവ് യൂണിവേഴ്സിറ്റി കാമ്പയിന് കമ്മിറ്റി പറഞ്ഞു.
കലിക്കറ്റ് യൂണിവേഴ്സിറ്റി വകുപ്പ് മേധാവി ഉമ്മര് തറമേല് ഉദ്യോഗാര്ത്ഥിക്കു നല്കിയ സ്വഭാവസര്ട്ടിഫിക്കറ്റും വിസിയ്ക്ക് രഹസ്യമായി നല്കിയ വിജോജനക്കുറിപ്പും എങ്ങനെ രാജേഷിന് ലഭിച്ചുവെന്ന് വിസി തന്നെ വെളിപ്പെടുത്തണമെന്നും സവ് യൂണിവേഴ്സിറ്റി കാമ്പയിന് കമ്മിറ്റി ഭാരവാഹികള് ആവശ്യപ്പെട്ടു.
