ചെന്നൈ: ബെംഗളൂരു മയക്കുമരുന്ന് കേസുമായി ബന്ധപ്പെട്ട് നടന്‍ വിവേക് ഒബ്റോയിയുടെ ഭാര്യാസഹോദരന്‍ ആദിത്യ ആല്‍വ അറസ്റ്റില്‍. ചെന്നൈയില്‍ നിന്നും ആദിത്യയെ സെന്‍ട്രല്‍ ക്രൈംബ്രാഞ്ച് അറസ്റ്റ് ചെയ്തത്. ബെംഗളൂരു മയക്കുമരുന്ന് കേസിലെ ആറാം പ്രതിയായ ആദിത്യ ആല്‍വ മാസങ്ങളായി ഒളിവിലായിരുന്നു.
മയക്കുമരുന്ന് എത്തിച്ചിരുന്നത് ആദിത്യയാണെന്ന വിലയിരുത്തലിലാണ് ഇപ്പോള്‍ അറസ്റ്റ് ചെയ്തിരിക്കുന്നത്. ഒളിവില്‍ പോയ ആദിത്യയെ കണ്ടെത്താനായി ക്രൈംബ്രാഞ്ച് പ്രത്യേക സംഘം രൂപീകരിച്ച് പരിശോധന നടത്തി വരികയായിരുന്നു. അതിനിടെ സൂചന ലഭിച്ചതിനെ തുടര്‍ന്ന് ക്രൈംബ്രാഞ്ച് നടത്തിയ നീക്കങ്ങളില്‍ ആദിത്യ പിടിയിലാവുകയായിരുന്നു.
ആദിത്യയെ കണ്ടെത്തുന്നതിനായി സഹോദരി ഭര്‍ത്താവായ നടന്‍ വിവേക് ഒബ്റോയിയുടെ വീട്ടിലും അന്വേഷണ സംഘം തെരച്ചില്‍ നടത്തിയിരുന്നു. നേരത്തെ ആദിത്യ ആല്‍വയുടെ ബെംഗളൂരുവിലെ വസതിയില്‍ സിസിബി നടത്തിയ റെയ്ഡില്‍ മയക്കുമരുന്ന് കണ്ടെടുത്തിരുന്നു. കേസില്‍ ഒരു സിനിമാ നടിയും കസ്റ്റഡിയിലായതായി റിപ്പോര്‍ട്ടുകളുണ്ട്.
