കൊട്ടാരക്കര: ക്ഷേമനിധി രസീത് ചോദിച്ച തയ്യല് തൊഴിലാളിയായ വനിതയ്ക്ക് നേരെ കൊട്ടാരക്കരയില് ആര്എസ്പി നേതാവിന്റെ കയ്യേറ്റവും അസഭ്യം വര്ഷവും. ചന്തമുക്കിലുളള ആര്എസ്പിയുടെ ഓഫീസിലെത്തിയ തൊഴിലാളിക്ക് നേരെയാണ് കഴിഞ്ഞ ദിവസം ആക്രമണമുണ്ടായത്.
സംഭവത്തില് ആര്എസ്പി നേതാവ് സലാഹുദ്ദീനെതിരെ പോലീസില് പരാതി നല്കി. തയ്യല് തൊഴിലാളി ക്ഷേമനിധിയിലേക്ക് മൂന്ന് വര്ഷങ്ങളായി അടച്ച പണത്തിന്റെ രസീത് ചോദിച്ച് എത്തിയപ്പോഴാണ് സലാഹുദ്ദീന് തൊഴിലാളി സ്ത്രീയോടും ഒപ്പമുണ്ടായിരുന്ന ആളോടും മോശമായി പെരുമാറിയത്.
ഇവരോട് അസഭ്യം പറയുന്നതും കസേര കൊണ്ട് ആക്രമിക്കുന്നതുമായ ദൃശ്യങ്ങള് സാമൂഹ്യ മാധ്യമങ്ങളിലൂടെ വ്യാപകമായി പ്രചരിക്കുകയും ചെയ്തു. സംഭവം വിവാദമായതോടെ ആര്എസ്പി വെട്ടിലായി. പാര്ട്ടിയുടെ മുഖം രക്ഷിക്കാനായി സലാഹുദ്ദീനെതിരെ നടപടിയുണ്ടാവുമെന്നാണ് സൂചന.
