വാഷിംഗ്ടണ്‍: ബ്രിട്ടണില്‍ പുതിയ കൊറോണ വൈറസ് വ്യാപകമാകുന്ന സാഹചര്യത്തില്‍ യുകെയില്‍ നിന്നും അമേരിക്കയിലേക്ക് പുറപ്പെടുന്നവര്‍ നിര്‍ബന്ധമായും കോവിഡ് ടെസ്റ്റ് നെഗറ്റീവാണെന്നുള്ളതിനുള്ള രേഖകള്‍ കൈവശം വെക്കണമെന്ന് യുഎസ് സെന്റേഴ്‌സ് ഫോര്‍ ഡിസിസീവ് കണ്‍ട്രോള്‍ ആന്റ് പ്രിവന്‍ഷന്‍ ഡിസംബര്‍ 24 വ്യാഴാഴ്ച വൈകീട്ടു പുറത്തിറക്കിയ ഉത്തരവില്‍ പറയുന്നു.
72 മണിക്കൂറിനുള്ളില്‍ പരിശോധിച്ച പിസിആര്‍ അല്ലെങ്കില്‍ ആന്റിജന്‍ ടെസ്റ്റിന്റെ റിസള്‍ട്ടും, മറ്റു ലബോറട്ടറി വസ്തുകളുടെ ഹാര്‍ഡ് കോപ്പിയോ, ഇലക്ട്രോണിക് കോപ്പിയോ ബോര്‍ഡിംഗിനു മുമ്പു അധികൃതരെ ഏല്‍പിക്കേണ്ടതാണെന്നും സിഡിസി അറിയിച്ചിട്ടുണ്ട്. യു.കെ.യില്‍ പൊട്ടിപുറപ്പെട്ട പുതിയ വൈറസ് മറ്റു രാജ്യങ്ങളിലേക്ക് വ്യാപിക്കാതിരിക്കുന്നതിന്റെ ഭാഗമായി നാല്‍പതോളം രാജ്യങ്ങള്‍ യു.കെ.യില്‍ നിന്നുള്ള യാത്രക്കാര്‍ക്ക് കര്‍ശന നിയന്ത്രങ്ങള്‍ ഏര്‍പ്പെടുത്തിയിട്ടുണ്ട്.
ഡിസംബര്‍ 25 വെള്ളിയാഴ്ച ഒപ്പുവെക്കുന്ന പുതിയ മാര്‍ഗനിര്‍ദ്ദേശങ്ങള്‍ ഡിസംബര്‍ 28 തിങ്കളാഴ്ച മുതല്‍ നിലവില്‍ വരും. അമേരിക്കന്‍ പൗരന്മാരുടെ സുരക്ഷയെ കരുതിയാണ് ഇങ്ങനെയൊരു തീരുമാനം സ്വീകരിക്കുന്നതിന് നിര്‍ബന്ധിതമായതെന്ന് ഏമര്‍ജന്‍സി വക്താവ് അറിയിച്ചു.
ജന്മഭൂമി ഓണ്‍ലൈന്‍