തിരുവനന്തപുരം : ബാര്കോഴക്കേസില് ഗവര്ണര് വിശദീകരണം തേടി ആഴ്ചകള് പിന്നിട്ടിട്ടും നല്കാതെ ഇടത് സര്ക്കാര്. തദ്ദേശ തെരഞ്ഞെടുപ്പിന് മുമ്പാകെ കോണ്ഗ്രസ്സിനെതിരെ ഉയര്ന്ന മുഖ്യ ആരോപണങ്ങളില് ഒന്നാണ് ബാര്കോഴക്കേസ്. എന്നാല് ഇതുമായി ബന്ധപ്പെട്ട് വിജിലന്സ് അന്വേഷണത്തിന് സംസ്ഥാന സര്ക്കാര് ഗവര്ണറോട് അനുമതി തേടുകയും ചെയ്തിരുന്നു.
തുടര്ന്ന് അന്വേഷണത്തിന് അനുമതി നല്കാന് കൂടുതല് തെളിവുകള് നല്കാനും ഗവര്ണര് ആവശ്യപ്പെടുകയും ചെയ്തിരുന്നു. എന്നാല് നാളുകള് പിന്നിട്ടിട്ടും സര്ക്കാര് നല്കാന് തയ്യാറായിട്ടില്ല. കൂടാതെ പ്രതിപക്ഷ നേതാവ് രമേശ് ചെന്നിത്തലയ്ക്കെതിരെയുള്ള അന്വേഷണത്തിന് സര്ക്കാര് അനുമതി നല്കിയെങ്കിലും ഇതുമായി ബന്ധപ്പെട്ട ഫയല് വിജിലന്സിന് നല്കിയിട്ടില്ല.
യുഡിഎഫ് സര്ക്കാരിന്റെ കാലത്ത് രമേശ് ചെന്നിത്തലയ്ക്കും മന്ത്രിമാരായിരുന്ന കെ. ബാബുവിനും വി.എസ്. ശിവകുമാറിനും പണം കൈമാറിയെന്ന് ബാര് ഉടമ ബിജു രമേശ് ആരോപിച്ചിരുന്നു. ബാര്കോഴ ആരോപണത്തില് മുന് മന്ത്രിമാര്ക്കെതിരെയുള്ള അന്വേഷണാനുമതി ആവശ്യപ്പെട്ടാണ് ഫയല് സര്ക്കാരിന് കൈമാറിയത്.
ഫയല് പരിശോധിച്ച ഗവര്ണര് നിലവില് അന്വേഷണ അനുമതി നല്കാനാവില്ലെന്നും നേരത്തെ നടത്തിയ അന്വേഷണത്തില് നിന്നും എന്തെല്ലാം കൂടുതല് തെളിവുകള് കിട്ടിയിട്ടുണ്ടെന്ന് അറിയിക്കണമെന്നും ആവശ്യപ്പെട്ട് സര്ക്കാരിന് മടക്കി നല്കി. ഇതിലാണ് സര്ക്കാര് ഇതുവരെയും വിശദീകരണം നല്കാത്തത്. മുന്മന്ത്രിക്കാര്ക്കെതിരെ നിലവില് നടക്കുന്ന അന്വേഷണത്തിന്റെ കൂടുതല് വിവരങ്ങളും ഗവര്ണര് ആവശ്യപ്പെട്ടിട്ടുണ്ട്.
