കൊച്ചി: പാലാരിവട്ടം ഫ്ളൈഓവര് അഴിമതിക്കേസില് അറസ്റ്റിലായ മുന്മന്ത്രി വി.കെ. ഇബ്രാഹിംകുഞ്ഞ് ഹൈക്കോടതിയില് സമര്പ്പിച്ച ജാമ്യാപേക്ഷയില് വിധി തിങ്കളാഴ്ച. ഹര്ജിയില് വാദം പൂര്ത്തിയായതോടെയാണ് വിധി പറയാന് മാറ്റിയത്. ഉദ്യോഗസ്ഥരടക്കമുള്ളവര് പരിശോധിച്ചു നടപടിക്രമങ്ങള് പൂര്ത്തിയാക്കിയാണ് ഫയലില് ഒപ്പുവച്ചതെന്ന് ഇബ്രാഹിംകുഞ്ഞിന്റെ അഭിഭാഷകന് വാദിച്ചപ്പോള് മന്ത്രി റബര് സ്റ്റാമ്പാണോയെന്നും ഉദ്യോഗസ്ഥര് കൊണ്ടുവരുന്ന ഫയലില് ഒപ്പിടലാണോ മന്ത്രിയുടെ പണിയെന്നും സിംഗിള് ബെഞ്ച് വാക്കാല് ചോദിച്ചു.
ഊരാളുങ്കല് സൊസൈറ്റിക്ക് മൊബിലൈസേഷന് അഡ്വാന്സ് നല്കിയതു കഴിഞ്ഞ ദിവസം സ്പീക്കര് ശ്രീരാമകൃഷ്ണന് വാര്ത്താ സമ്മേളനത്തില് പറഞ്ഞിരുന്നുവെന്നും സമാന രീതിയിലാണ് പാലാരിവട്ടം ഫ്ളൈഓവര് നിര്മാണ കമ്പനിക്ക് മൊബിലൈസേഷന് അഡ്വാന്സ് നല്കിയതെന്നും ഇബ്രാഹിംകുഞ്ഞിന്റെ അഭിഭാഷകന് ചൂണ്ടിക്കാട്ടി. ചട്ടപ്രകാരം മുന്കൂര് പണം നല്കാനാവില്ലെന്നിരിക്കെ കരാര് കമ്പനിക്ക് പണം അനുവദിക്കുന്നതിനു മുമ്പ് നിയമ വകുപ്പിന്റെ അഭിപ്രായം തേടിയോയെന്നും കോടതി വാക്കാല് ചോദിച്ചു.
ജന്മഭൂമി ഓണ്ലൈന്