കൊല്ലം: എസ്എന്‍ ട്രസ്റ്റ് മെഡിക്കല്‍ മിഷന്റെ ഉടമസ്ഥതയിലുള്ള ശങ്കേഴ്‌സ് ആശുപത്രിയില്‍ കൂട്ടപിരിച്ചുവിടല്‍. നഴ്‌സിംഗ് അസിസ്റ്റന്റുമാര്‍ ഉള്‍പ്പെടെ 40 ജീവനക്കാരെ പത്താം തീയതിയാണ് പിരിച്ചുവിട്ടത്. 15 മുതല്‍ 21 വര്‍ഷം വരെ സര്‍വീസ് ഉണ്ടായിരുന്നവര്‍ പിരിച്ചുവിടപ്പെട്ടവരിലുണ്ട്.
ഇന്നലെ ജീവനക്കാര്‍ പ്രതിഷേധവുമായി ആശുപത്രിക്ക് മുന്നില്‍ സമരം ചെയ്‌തെങ്കിലും മാനേജ്‌മെന്റ് വഴങ്ങിയില്ല. മെഡിക്കല്‍മിഷന്‍ അസിസ്റ്റന്റ് സെക്രട്ടറി രാജേന്ദ്രന്‍ ഒപ്പിട്ടുനല്‍കിയ ഉത്തരവനുസരിച്ച് സ്ഥാപനം നഷ്ടത്തിലാണെന്നും രോഗികള്‍ വന്‍തോതില്‍ കുറഞ്ഞിരിക്കുകയാണെന്നും പറയുന്നു. കൊല്ലം നഗരത്തിലെ പ്രമുഖ ആശുപത്രിയായ ശങ്കേഴ്‌സില്‍ പത്തുവര്‍ഷമായി രോഗികള്‍ വളരെ കുറവാണ്. 268 ജീവനക്കാരാണ് ആകെയുള്ളത്. ആശുപത്രിയില്‍ ആധുനിക സംവിധാനങ്ങള്‍ വര്‍ധിപ്പിച്ചിട്ടും ഫലമുണ്ടാകാത്ത സാഹചര്യത്തിലാണ് കോവിഡ് കൂടിയെത്തിയത്.
മറ്റ് ആശുപത്രികളിലെ പോലെ മൂന്നിലൊന്ന് ലോസ് ഓഫ് പേയ്‌ക്ക് തയ്യാറായി ജീവനക്കാര്‍ സ്വയം മുന്നോട്ടുവരണമെന്ന നിര്‍ദേശം മാനേജ്‌മെന്റ് വച്ചെങ്കിലും ഫലം കണ്ടില്ല. അവസാനഘട്ടത്തിലാണ് പിരിച്ചുവിടലിലേക്ക് കടന്നത്. ലേബര്‍ നിയമം അനുസരിച്ചുള്ള എല്ലാ ആനുകൂല്യങ്ങളും പിരിച്ചുവിടപ്പെട്ടവര്‍ക്ക് നല്‍കിയതായാണ് മാനേജ്‌മെന്റ് നിലപാട്.
