കോഴിക്കോട്: വോട്ടഭ്യര്ത്ഥിച്ച് ചുമരെഴുതാന് സ്ഥാനാര്ത്ഥിയും. കക്കോടി ഗ്രാമപഞ്ചായത്ത് 19-ാം വാര്ഡ് ബിജെപി സ്ഥാനാര്ത്ഥി വി. വിജിത്താണ് തനിക്ക് വേണ്ടി വോട്ട് അഭ്യര്ത്ഥിച്ച് ചുമരെഴുതുന്നത്.
പരസ്യചിത്രകലാ രംഗത്ത് നിറസാന്നിദ്ധ്യമായിരുന്ന നടക്കാവ് സുരന്സ് ആര്ട്സിലെ ആര്ട്ടിസ്റ്റ് കക്കോടി മോരീക്കര വളപ്പില് വി. സുരേന്ദ്രന്റെയും വിനീതയുടെയും മകനാണ് വി. വിജിത്ത്. ഏതു തെരഞ്ഞെടുപ്പുവന്നാലും നടക്കാവിലെ സുരന്സ് ആര്ട്സില് തിരക്കായിരുന്നു.
കഴിഞ്ഞ തെരഞ്ഞെടുപ്പുകാലങ്ങളില് ചുമരെഴുത്തും പോസ്റ്ററെഴുത്തുമായി വി. വിജിത്തും അനിയന് വി. അഖിലും അച്ഛനൊപ്പമുണ്ടാവാറുണ്ടായിരുന്നു. എന്നാല് ഇത്തവണ ചുമരെഴുതാന് അച്ഛനില്ല.
കഴിഞ്ഞ വര്ഷമാണ് സുരേന്ദ്രന് മരിച്ചത്. വിജിത്ത് ജന്മഭൂമി കോഴിക്കോട് ബ്യൂറോയിലെ റിപ്പോര്ട്ടറാണ്. സഹോദരന് വി. അഖിലും മത്സരരംഗത്തുണ്ട്. പതിനൊന്നാം വാര്ഡിലാണ് അഖില് ബിജെപി സ്ഥാനാര്ത്ഥിയായി മത്സരിക്കുന്നത്. യുവമോര്ച്ച മണ്ഡലം വൈസ് പ്രസിഡന്റാണ് അഖില്.
