തിരുവനന്തപുരം: ബാര്കോഴ കേസില് രമേശ് ചെന്നിത്തലയ്ക്കെതിരെ വിജിലന്സ് അന്വേഷണത്തിന് സംസ്ഥാന സര്ക്കാര് ഉത്തരവ്. ബാര് ഉടമയായ ബിജു രമേശിന്റെ വെളിപ്പെടുത്തലുകളുടെ അടിസ്ഥാനത്തില് പരാതി ലഭിച്ചതിനെ തുടര്ന്നാണ് നടപടി. ഇതു സംബന്ധിച്ച് മുഖ്യമന്ത്രി പിണറായി വിജയന് ഉത്തരവിറക്കി കഴിഞ്ഞു.
പാലാരിവട്ടം പാലം അഴിമതിക്കേസില് ഇബ്രാഹിം കുഞ്ഞിനെ വിജിലന്സ് അറസ്റ്റ് ചെയ്തതിന് പിന്നാലെ യുഡിഎഫ് നേതാക്കള് ഉള്പ്പെട്ട കേസുകളില് അന്വേഷണം ഊര്ജ്ജിതമാക്കാന് സംസ്ഥാന സര്ക്കാര് തീരുമാനിച്ചിരുന്നു. അതിന്റെ ഭാഗമായാണ് ഇപ്പോള് ചെന്നിത്തലയ്ക്കെതിരെ വിജിലന്സ് അന്വേഷണത്തിന് ഉത്തരവിറക്കിയിരിക്കുന്നത്. പ്രതിപക്ഷ നേതാവ് രമേശ് ചെന്നിത്തലയെ കൂടാതെ മുന് മന്ത്രിമാരായ വി.എസ്. ശിവകുമാര്, കെ. ബാബു എന്നിവര്ക്കെതിരേയും അന്വേഷണം ഉണ്ടാകും. കെ.എം. മാണിക്കെതിരായ ബാര് കോഴക്കേസിന് പിന്നില് ഗൂഢാലോചനയാണെന്ന് അടുത്തിടെ കേരള കോണ്ഗ്രസ് അന്വേഷണ റിപ്പോര്ട്ട് പുറത്തുവിട്ടു. അതിനു പിന്നാലെ പണം കൈ മാറിയത് സംബന്ധിച്ച് ബിജി രമേശ് കണക്കുകള് പുറത്തുവിട്ടിരുന്നു. ഇതിന്റെ അടിസ്ഥാനത്തിലാണ് നടപടി.
ബാര് ലൈസന്സ് ഫീസ് കുറയ്ക്കാന് കുറയ്ക്കാന് ബാറുടമകള് പിരിച്ച പണം അന്നത്തെ കെപിസിസി പ്രസിഡന്റായിരുന്ന രമേശ് ചെന്നിത്തല, മുന് എക്സൈസ് മന്ത്രി കെ. ബാബു, മുന് ആരോഗ്യമന്ത്രി വി.എസ്. ശിവകുമാര് എന്നിവര്ക്ക് കൈമാറിയെന്നായിരുന്നു ബിജു രമേശിന്റെ വെളിപ്പെടുത്തല്. എന്നാല് ആദ്യം കെ.എം. മാണിക്കെതിരെ കോടതിയില് രഹസ്യമൊഴി നല്കിയ ബിജുരമേശ് ബാര് ലൈസന്സ് ഫീസ് കുറയ്ക്കാന് പണം വാങ്ങിയ കാര്യം വെളിപ്പെടുത്തിരുന്നു. പക്ഷെ ചെന്നിത്തല അടക്കമുള്ള മറ്റ് നേതാക്കള്ക്കെതിരെ രഹസ്യമൊഴിയില് പരാമര്ശം ഉണ്ടായിരുന്നില്ല. അതാണ് പിന്നീട് മാറ്റിപ്പറഞ്ഞത്.
ആദ്യ ബാര്കോഴയില് മാണിക്കും ബാബുവിനുമെതിരെ മാത്രമായിരുന്നു വിജിലന്സിന്റെ അന്വേഷണം. അതേസമയം ബിജു രമേശിന്റെ പുതിയ വെളിപ്പെടുത്തലിന്റെ അടിസ്ഥാനത്തില് പ്രാഥമിക അന്വേഷണം നടത്തിയ വിജിലന്സ് കേസെടുത്ത് അന്വേഷിക്കണമെന്ന റിപ്പോര്ട്ടാണ് സര്ക്കാറിന് നല്കിയത്. മുഖ്യമന്ത്രി അനുമതി നല്കിയെങ്കിലും പ്രതിപക്ഷനേതാവ് മുന്മന്ത്രിമാര് എന്നിവര്ക്കെതിരായ അന്വേഷണത്തിന് ഉത്തരവിറക്കാന് ഗവര്ണറുടേയും സ്പീക്കറുടേയും അനുമതി കൂടി വേണം.
