ഭാഗവതം, നാരായണീയം, ഗീതാഗോവിന്ദം തുടങ്ങിയ ഭക്തി ഗ്രന്ഥങ്ങളുടെ സ്വാധീനം കൃഷ്ണഗീതിയില് ദര്ശിക്കാം. ഭാഗവതത്തിലെ ദശമ, ഏകാദശ സ്കന്ദങ്ങളിലെ ശ്രീകൃഷ്ണാവതാര ശേഷമുള്ള കഥാഭാഗങ്ങളാണ് ഇതിലെ പ്രതിപാദ്യം. കവിയുടെ ഭാവനാവൈഭവം സ്പഷ്ടമാക്കുന്ന പല സന്ദര്ഭങ്ങളും ഈ കൃതിയില് കാണാം.
ഇതിലെ പദങ്ങളും, ശ്ലോകങ്ങളുമെല്ലാം ശുദ്ധസംസ്കൃതത്തിലാണ് ഉള്ളത്. ശ്രീകൃഷ്ണാവതാരം മുതല് സ്വര്ഗാരോഹണം വരെയുള്ള എട്ടു കഥാ സന്ദര്ഭങ്ങളാണ് കൃഷ്ണനാട്ട പ്രമേയം. അവതാരം, കാളിയമര്ദ്ദനം, രാസക്രീഡ, കംസവധം, സ്വയംവരം, ബാണയുദ്ധം, വിവിദ വധം, സ്വര്ഗാരോഹണം എന്നിവയാണ് ഈ കഥകള്. പണ്ട് കാലത്തു ക്ഷേത്രങ്ങളിലും, കോവിലകങ്ങളിലും, ഇല്ലങ്ങളിലും മാത്രമേ കൃഷ്ണനാട്ടം അരങ്ങേറാറുണ്ടായിരുന്നുള്ളൂ.
1958നു ശേഷമാണ് കളിയോഗം ഗുരുവായൂര് ദേവസ്വം ഏറ്റെടുത്ത് ആസ്ഥാനം ഗുരുവായൂര്ക്കു മാറ്റിയത്. തുടര്ന്ന് ഇത് വഴിപാടായി ശീട്ടാക്കി നടത്തുവാന് തുടങ്ങി. ഇപ്പോള് രാജ്യത്തിന്റെ വിവിധ ഭാഗങ്ങളിലും, വിദേശ രാജ്യങ്ങളിലും പര്യടനം നടത്തി ഈ മോഹന ദൃശ്യവിരുന്ന് അവതരിപ്പിക്കാന് കഴിഞ്ഞതില് ഗുരുവായൂര് ദേവസ്വത്തിന് അഭിമാനിക്കാം.
വിജയദശമി ദിവസം മുതല് വര്ഷം തോറും നവരാത്രികളിലായി ദേവസ്വത്തിന്റെ അരങ്ങു കളി പതിവ് ഉണ്ട്. ഏറ്റവും മികച്ച കലാകാരന് ‘മാനവേദസ്മാരക’സുവര്ണമുദ്ര നല്കാറുമുണ്ട്. അന്നേദിവസം ശ്രീ മാനവേദസ്മാരകസമാധിയില് നിന്നും ഗജവീരസമേതം ഘോഷയാത്രയും, പ്രത്യേക സമ്മേളനവും, കലാകാരന്മാരെ ആദരിക്കുന്ന ചടങ്ങും ദേവസ്വം നടത്താറുണ്ട്.
കൃഷ്ണനാട്ടത്തില് നൃത്തത്തിന് പ്രത്യേകം പരിഗണന നല്കിയിട്ടുണ്ട്. രാസക്രീഡയിലെയും അവതാരത്തിലേയും ‘മുല്ലപ്പൂചുറ്റല്’എന്ന സവിശേഷ ചാരുതയാര്ന്ന നൃത്തം അത്യന്തം മനോഹാരിതയാര്ന്നതാണ്. ബാണവധത്തിലും കംസവധത്തിലും ആകര്ഷണീയങ്ങളായ യുദ്ധ, താണ്ഡവ നൃത്തങ്ങളും ദര്ശിക്കാവുന്നതാണ്.
പി.കെ. മുരളീധരന് രാജ
