കോഴിക്കോട്: കോര്പറേഷന് കൗണ്സില് യോഗങ്ങളിലും ഓഫീസിലും പരിപാടികളിലും അഞ്ചു കൊല്ലം ഒന്നിച്ചിരുന്നവര്, പലപ്പോഴും വാക്കുകള് കൊണ്ട് ഏറ്റുമുട്ടിയവര്, സൗഹൃദം പങ്കുവെച്ചവര് അവര് ഒരിക്കല് കൂടി ഒന്നിച്ചിരുന്നു. കാലാവധി തികയുന്നതിന്റെ തലേദിവസം യാത്ര പറഞ്ഞ് പിരിഞ്ഞു. ടാഗോര് സെന്റനറിനറി ഹാളിലാണ കോര്പറേഷന് 2015- 2020 ഭരണസമിതിയുടെ അവസാനയോഗം ചേര്ന്നത്. തെരഞ്ഞെടുപ്പ് വിജ്ഞാപനം വന്നതിനാല് നടപടിക്രമങ്ങളോ നയപരിപാടികളുടെ ചര്ച്ചകളോ ഒന്നും ഇല്ലായിരുന്നു. യാത്ര പറച്ചില് മാത്രം. കോവിഡ് മുന്കരുതലോടെ നടത്തിയ യോഗത്തില് പല മുതിര്ന്ന കൗണ്സിലര്മാരും ഇനി മത്സരത്തിനില്ലെന്ന് പരോക്ഷമായി സൂചിപ്പിച്ചു.
30ലേറെ വര്ഷം കൗണ്സിലര്മാരായിരുന്ന മേയര് തോട്ടത്തില് രവീന്ദ്രന്, പി. കിഷന്ചന്ദ്, 21 കൊല്ലം കൗണ്സിലറായ സി. അബ്ദുറഹിമാന്, പ്രതിപക്ഷ നേതാവ് അഡ്വ.പി.എം. സുരേഷ് ബാബു തുടങ്ങിയവരെല്ലാം കൗണ്സിലറായുള്ള അവസാനവാക്കുകളെന്ന രീതിയിലാണ് പ്രസംഗിച്ചത്. വരാനിരിക്കുന്ന രാഷ്ട്രീയപോരിന്റെ പിരിമുറുക്കത്തിലും സൗഹൃദാന്തരീക്ഷം നഷ്ടപ്പെടാതിരിക്കാന് ശ്രദ്ധിച്ചായിരുന്നു പ്രസംഗം.
മേയര്ക്കുള്ള ജീവനക്കാരുടെ ഉപഹാരം കോര്പറേഷന് സെക്രട്ടറി ബിനു ഫ്രാന്സിസ് കൈമാറി. ഡെപ്യൂട്ടി മേയര് മീരാ ദര്ശക്, ആരോഗ്യ സ്റ്റാന്റിംഗ് കമ്മറ്റി ചെയര്മാര് കെ.വി. ബാബുരാജ്, പ്രതിപക്ഷനേതാവ് അഡ്വ.പി.എം. സുരേഷ് ബാബു, ബിജെപി കൗണ്സില് പാര്ട്ടി ലീഡര് നമ്പിടി നാരായണന്, സി. അബ്ദുറഹിമാന്, പി. ഉഷാദേവി, എന്. പത്മനാഭന്, പി. കിഷന്ചന്ദ്, ആശാ ശശാങ്കന് തുടങ്ങിയവരും സംസാരിച്ചു. യോഗത്തിനുശേഷം മേയര് ഭവനില് ഗ്രൂപ്പ് ഫോട്ടോയും ഉച്ചയൂണും കഴിഞ്ഞാണ് അംഗങ്ങള് പിരിഞ്ഞത്.
