ബത്തേരി: തദ്ദേശ സ്വയംഭരണ തെരഞ്ഞെടുപ്പിനായി സംസ്ഥാനം ഒരുങ്ങികൊണ്ടിരിക്കുന്നസമയത്ത് സംസ്ഥാനത്ത് ഗോത്രവര്ഗ്ഗജനത കൂടുതലുള്ള വയനാട് ജില്ലയില് ഇവരെ കേന്ദ്രീകരിച്ച് രാഷ്ട്രീയമുന്നണികള് പ്രവര്ത്തനം ആരംഭിച്ചു കഴിഞ്ഞു. ഇവരുടെ വോട്ടുകളായിരിക്കും ജില്ലയില് മിക്ക ഇടങ്ങളിലും ജയപരാജയങ്ങള് നിര്ണ്ണയിക്കുക. ജില്ലയില് ജനസംഖ്യയുടെ 19 ശതമാനം വരുന്ന ഈ ജനവിഭാഗത്തെ കേന്ദ്രീകരിച്ചാണ് എന്ഡിഎയും ഇടതുപക്ഷവും, വലതുപക്ഷവും, പ്രവര്ത്തനങ്ങള് നടത്തുന്നത്.
നിലവിലെ കണക്കു പ്രകാരം ജില്ലയില് 8,17,429 ആണ് ജനസംഖ്യ. ഇതില് 11 ഗോത്ര വിഭാഗങ്ങളിലായി 1,51,443ഉം ഗോത്രജനങ്ങളാണ്. ഇതില്തന്നെ പണിയ വിഭാഗം 69116ഉം, കുറിച്യര് 25266ഉം, മുള്ളക്കുറുമര് 20983 മാണ്. ഈ ഗോത്രവിഭാഗങ്ങളില് ഉയര്ന്ന സാക്ഷരത നിരക്കുകൊണ്ട് ജീവിതനിലവാരം സാമൂഹികമായും സാമ്പത്തികമായും ഉന്നതിയിലാക്കാന് കുറിച്യ, മുള്ളകുറുമ വിഭാഗങ്ങള്ക്കായിട്ടുണ്ട്. അതുകൊണ്ടുതന്നെ തെരഞ്ഞുടുപ്പില് അവരുടെ നിലപാട് വ്യക്തമാക്കാനും ഒരു സമ്മര്ദ്ദ ഗ്രൂപ്പായി പ്രവര്ത്തിക്കാനും ഇവര്ക്കു സാധിക്കും.
കൂടാതെ ഗോത്രവിഭാഗങ്ങളില് നിന്നും എത്തുന്ന സ്ഥാനാര്ത്ഥികള് ഈ രണ്ട് വിഭാഗങ്ങളില് നിന്നുമുള്ളവരായിരിക്കും കൂടുതല്. എന്നാല് മറ്റ് ഗോത്ര വിഭാഗങ്ങളായ പണിയ, കട്ടുനായ്ക്ക, ഊരാളി, അടിയ എന്നിവരുടെ ജീവിത ദുരിതങ്ങളും നിരക്ഷരതയും കാരണം ഇപ്പോഴും പ്രതിസന്ധി നേരിടുന്നവരാണ്. അതിനാല് തന്നെ രാഷ്ട്രീയ പാര്ട്ടികള് തെരഞ്ഞെടുപ്പ് സമയത്ത് കൂടുതലായി ശ്രദ്ധകേന്ദ്രീകരിക്കുന്നത് ഈ വിഭാഗക്കാരിലാണ്. ഈ വിഭാഗങ്ങളെ പണമോ മദ്യമോ നല്കി ഇത്തരം കോളനി വോട്ടര്മാരെ തങ്ങളുടെ വശത്താക്കാന് ശ്രമംനടത്താറുമുണ്ട്. പക്ഷേ ഭൂമിക്കുവേണ്ടി വര്ഷങ്ങളായി ഇവര് നടത്തുന്ന പോരാട്ടങ്ങള് ഇവരുടെ രാഷ്ട്രീയമായ ചിന്താഗതികള് മാറാന് കാരണമായിട്ടുമുണ്ട്.
കൂടാതെ ഇലക്ഷന് കമ്മീഷന്റെ ശക്തമായ ഇടപെടലും ഇത്തരം നടപടികള്ക്ക് കുറേയൊക്കെ മാറ്റം വരുത്താന് കഴിഞ്ഞിട്ടുണ്ട്. ഗോത്രമേഖലകളില് കൊണ്ടുവന്ന വികസന പ്രവര്ത്തനങ്ങള് ഉയര്ത്തികാണിക്കുമ്പോളും നിലവില് 3000ാളം കുടുംബങ്ങള് ഭൂരഹിതരും, 5000ാളം കുടുംബങ്ങള്ക്ക് വീടുമില്ല. ജില്ലയിലെ കുഗ്രാമങ്ങളില് താമസിക്കുന്ന ഗോത്രവിഭാഗകുടുംബങ്ങള്ക്ക് അടിസ്ഥാന സൗകര്യങ്ങളായ റോഡ്, കുടിവെള്ളം, വൈദ്യുതി എന്നിവ ഇപ്പോഴും അന്യമാണ്. ഈ വിഷയങ്ങളെല്ലാം തന്നെ വീണ്ടും തെരഞ്ഞെടുപ്പില് ചര്ച്ചയാകുമെന്നതില് സംശയമില്ല.
