കോഴിക്കോട്: പതിറ്റാണ്ടുകളായുള്ള സിപിഎം നേതൃത്വത്തിലുള്ള കോര്‍പറേഷന്‍ ഭരണം നഗരവാസികള്‍ക്ക് ശാപവും ഭാരവുമായി മാറിയിരിക്കുകയാണെന്ന് ബിജെപി ദേശീയ കൗണ്‍സില്‍ അംഗം കെ.പി. ശ്രീശന്‍. സിപിഎം നേതൃത്വം നല്‍കുന്ന കോര്‍പറേഷന്‍ ഭരണസമിതിയുടെ അഴിമതിക്കും കെടുകാര്യസ്ഥതക്കുമെതിരെ ബിജെപി കൗണ്‍സിലര്‍മാര്‍ കോര്‍പറേഷന്‍ ഓഫീസിന് മുന്നില്‍ നടത്തുന്ന സപ്തദിന സത്യഗ്രഹം സമാപന ദിവസം ഉദ്ഘാടനം ചെയ്യുകയായിരുന്നു അദ്ദേഹം.
അഴിമതിയിലും സ്വജനപക്ഷപാതത്തിലും സംസ്ഥാനസര്‍ക്കാരിന്റെ തനി പകര്‍പ്പാണ് കോഴിക്കോട് കോര്‍പറേഷന്‍. കേന്ദ്രസര്‍ക്കാര്‍ പദ്ധതികള്‍ സ്വന്തം പേരിലാക്കാന്‍ സംസ്ഥാന സര്‍ക്കാരിനെപ്പോലെ കോര്‍പറേഷനും മത്സരിക്കുകയാണ്. സംസ്ഥാന സര്‍ക്കാരിനും കോര്‍പറേഷനും നാമമാത്രവിഹിതം മാത്രമുള്ള പദ്ധതികള്‍ പോലും തങ്ങളുടേത് മാത്രമാണെന്ന് പ്രചരണം നടത്തി കേന്ദ്രത്തെ തമസ്‌ക്കരിക്കുകയാണിവിടെ. ബസ് സ്റ്റോപ്പുകളും പാര്‍ക്കുകളുമടക്കമുള്ള സ്ഥലങ്ങള്‍ പരിപാലനത്തിന്റെ പേരില്‍ സ്വകാര്യ ഏജന്‍സികള്‍ക്കും സ്ഥാപനങ്ങള്‍ക്കും തീറെഴുതി കൊടുക്കുകയാണ്. സുന്ദരവാഗ്ദാനങ്ങള്‍ നല്‍കി അധികാരത്തില്‍ എത്തിയവര്‍ക്ക് ഒന്നും ചെയ്യാനായില്ലെന്നും അദ്ദേഹം കൂട്ടിച്ചേര്‍ത്തു.
ബേപ്പൂര്‍ വാര്‍ഡ് കൗണ്‍സിലര്‍ എന്‍. സതീഷ്‌കുമാറാണ് സമാപന ദിവസം സത്യഗ്രഹം അനുഷ്ഠിച്ചത്. ബിജെപി ബേപ്പൂര്‍ മണ്ഡലം പ്രസിഡന്റ് ഷിനു പിണ്ണാണത്ത് അദ്ധ്യക്ഷനായി. ബിജെപി കൗണ്‍സില്‍ പാര്‍ട്ടി ലീഡര്‍ നമ്പിടി നാരായണന്‍, കൗണ്‍സിലര്‍മാരായ ഇ. പ്രശാന്ത്കുമാര്‍, ടി. അനില്‍കുമാര്‍, നവ്യ ഹരിദാസ്, ഷൈമ പൊന്നത്ത്, ജിഷ ഗിരീഷ്, ഒബിസി മോര്‍ച്ച ജില്ലാ പ്രസിഡന്റ് നാരങ്ങയില്‍ ശശിധരന്‍, സി. സാബുലാല്‍ തുടങ്ങിയവര്‍ സംസാരിച്ചു.
പ്രതികരിക്കാൻ ഇവിടെ എഴുതുക: