തൊടുപുഴ: ജില്ലയില് കൊറോണ രോഗികള്ക്ക് മതിയായ ചികില്സാ സൗകര്യങ്ങള് ലഭ്യമാകുന്നുണ്ടെന്ന് ജില്ലാ കളക്ടര് ഉറപ്പ് വരുത്തണമെന്ന് ജില്ലാ ലീഗല് സര്വീസസ് അഥോറിറ്റി. കോവിഡ് വ്യാപനം രൂക്ഷമായിട്ടും തൊടുപുഴ ജില്ലാ ആശുപത്രിയിലെ വെന്റിലേറ്ററുകള് ശരിയായ രീതിയില് പ്രവര്ത്തിക്കുന്നില്ലെന്നത് ഞെട്ടിപ്പിക്കുന്നുവെന്ന് അഥോറിറ്റി സെക്രട്ടറിയും സബ് ജഡ്ജിയുമായ ദിനേശ് എം.പിള്ള ജില്ലാ കളക്ടര് എച്ച്. ദിനേശന് നല്കിയ റിപ്പോര്ട്ടില് വ്യക്തമാക്കി. കഴിഞ്ഞ ദിവസം ജില്ലാ ആശുപത്രിയില് സന്ദര്ശനം നടത്തിയതിന് ശേഷമാണ് അഥോറിറ്റി ഇതുമായി ബന്ധപ്പെട്ട് കളക്ടര്ക്ക് റിപ്പോര്ട്ട് നല്കിയത്. ജില്ലയിലെ സ്വകാര്യ ആശുപത്രികള് കോവിഡ് രോഗികളെ പ്രവേശിപ്പിക്കുന്നില്ലെന്നും തൊടുപുഴ ജില്ലാ ആശുപത്രിയില് വെന്റിലേറ്റര് സൗകര്യമില്ലെന്നുമുള്ള പരാതിയുടെ അടിസ്ഥാനത്തിലാണ് അഥോറിറ്റി സെക്രട്ടറി കഴിഞ്ഞ ദിവസം ഇവിടെ സന്ദര്ശനം നടത്തിയത്.
കൊറോണ രോഗികളുടെ ചികിത്സയ്ക്ക് ജില്ലാ ആശുപത്രിയിലെ സൗകര്യങ്ങള് പര്യാപ്തമല്ലെന്ന് പരിശോധനയില് വ്യക്തമായതായി അദ്ദേഹം റിപ്പോര്ട്ടില് പറഞ്ഞു. ആശുപത്രിയില് 10 വെന്റിലേറ്ററുകള് ലഭ്യമാണെങ്കിലും അനുബന്ധ അടിസ്ഥാന സൗകര്യങ്ങളുടെ അഭാവത്തില് അവ ഉപയോഗപ്രദമല്ല. വെന്റിലേറ്ററുകള് ഉപയോഗിച്ച് ആറ് കിടക്കകള് ക്രമീകരിച്ചിരിക്കുന്ന ഐസിയു മുറിയില് പരിശോധന നടത്തിയപ്പോള് വെന്റിലേറ്ററുകളുടെ ശരിയായ പ്രവര്ത്തനത്തിന് ആവശ്യമായ ഓക്സിജന് പ്ലാന്റും ഇല്ല. ഓക്സിജന് പ്ലാന്റ് നിര്മിക്കാനുള്ള നിര്ദ്ദേശം പോലുമില്ലെന്നും ഇതിനുള്ള പദ്ധതിയോ എസ്റ്റിമേറ്റോ ഇതുവരെ തയാറാക്കിയിട്ടില്ല. നിലവില്, അടുത്തുള്ള കെട്ടിടത്തില് സ്ഥാപിച്ചിരിക്കുന്ന ഓക്സിജന് സിലിണ്ടറുകളില് നിന്ന് നീളമുള്ള പൈപ്പ് ലൈനിലൂടെയാണ് ഓക്സിജന് വെന്റിലേറ്ററുകളിലേക്ക് ആകര്ഷിക്കപ്പെടുന്നത്. ഇത് വെന്റിലേറ്ററുകള് ശരിയായി പ്രവര്ത്തിക്കാന് ആവശ്യമായ ഓക്സിജന്റെ ഒഴുക്ക് അനുവദിക്കുന്നില്ല. ഐസിയു എയര്കണ്ടീഷന് ചെയ്യാത്തതിനാല് വായു അണുവിമുക്തമാക്കാനോ പുറംതള്ളാനോ ഉള്ള സൗകര്യമില്ല.
കോവിഡ് രോഗികളെ പരിചരിക്കാന് നഴ്സുമാരുടെയും സാങ്കേതിക ജീവനക്കാരുടെയും അപര്യാപ്തതയുമുണ്ട്. ഐസിയു ടെക്നീഷ്യന്മാര് ഇല്ലാത്തതിനാല് വെന്റിലേറ്ററുകള് പ്രായോഗികമായി ഉപയോഗത്തിലില്ലെന്നും കണ്ടെത്തി. കോവിഡ് രോഗികള്ക്ക് സ്വകാര്യ ആശുപത്രികളില് പത്ത് ശതമാനം കിടക്കകള് നീക്കി വയ്ക്കാന് ജില്ലാ കളക്ടര് ഉത്തരവ് പുറപ്പെടുവിച്ചെങ്കിലും ഇത് പാലിക്കപ്പെടുന്നില്ലെന്നും ലീഗല് സര്വീസസ് അഥോറിറ്റി സെക്രട്ടറി നല്കിയ റിപ്പോര്ട്ടില് ചൂണ്ടിക്കാട്ടി.
