പൊഖ്റാന് : ഇന്ത്യ തദ്ദേശീയമായ ടാങ്ക്വേധ മിസൈല് നാഗ് മിസൈലുകള് വിജയകരമായി പരീക്ഷിച്ചു ഇനി യുദ്ധമുഖത്തേയ്ക്ക്. പുലര്ച്ചെ 6.45ന് രാജസ്ഥാനിലെ പൊഖ്റാന് മരുഭൂമിയിലെ ഫയറിങ് റേഞ്ചില് നിന്നാണ് പോര്മുന ഘടിപ്പിച്ചുള്ള അന്തിമ പരീക്ഷണം നടത്തിയതെന്ന് ഡിഫന്സ് റിസര്ച് ആന്ഡ് ഡവലപ്മെന്റ് ഓര്ഗനൈസേഷന്(ഡിആര്ഡിഒ) അറിയിച്ചു. അവസാന ഘട്ട പരീക്ഷണം പൂര്ത്തിയായതോടെ മിസൈല് ഉടന് തന്നെ കരസേനയ്ക്ക് കൈമാറും.
പൂര്ണമായും തദ്ദേശീയമായി ഇന്ത്യ വികസിപ്പിച്ചെടുത്ത ഇന്ത്യയുടെ മൂന്നാം തലമുറ മിസൈലാണ് നാഗ്. കരയാക്രമണത്തില് സൈന്യത്തിന് മുതല്കൂട്ടാകുന്ന ആയുധമാണിത്. ടാങ്കുകളെ തകര്ക്കാനുള്ള ഏറ്റവും കരുത്തേറിയ മിസൈല് ആണ് ഇത്. ശത്രുക്കളുടെ അത്യാധുനിക ടാങ്കുകളേയും കവചിത വാഹനങ്ങളേയും തകര്ക്കാന് പാകത്തിനാണ് നാഗിന്റെ രൂപകല്പ്പന. മിസൈല് വഹിക്കുന്ന പ്രത്യേക വാഹനമാണ് നാഗിനെ നിയന്ത്രിക്കുന്നത്. നാലു മുതല് ഏഴ് കിലോമീറ്റര് വരെ ദൂരത്തുള്ള ലക്ഷ്യങ്ങളാണ് ഭേദിക്കുക. നേരിട്ട് യുദ്ധഭൂമിയില് ഉപയോഗിക്കാനുള്ള മിസൈലുകളാണ് നാഗെന്നും ഡിആര്ഡിഒ വ്യക്തമാക്കി.
ഏത് കാലാവസ്ഥയിലും നാഗ് മിസൈലുകള് പ്രയോഗിക്കാനാകും. തെര്മ്മല് ഇമേജിങ് റഡാറിന്റെ സഹായത്തോടെ ലക്ഷ്യം നിര്ണയിച്ച് ആക്രമണം നടത്തുകയാണ് മിസൈല് ചെയ്യുന്നത്. 1980കളില് ഇന്ത്യ തയ്യാറാക്കിയ അഞ്ച് മിസൈല് പദ്ധതികളില് ഒന്നാണ് നാഗ്. അഗ്നി, പ്രിഥ്വി, ആകാശ്, ത്രിശൂല് എന്നിവയാണ് മറ്റുള്ളവ. ഇതില് ത്രിശൂല് പദ്ധതി പിന്നീട് ഉപേക്ഷിച്ചു. മറ്റ് മൂന്ന് മിസൈലുകളും ഇപ്പോള് സൈന്യത്തിന്റെ ഭാഗമാണ്.
രണ്ടര കിലോമീറ്ററിനപ്പുറത്തേക്ക് പ്രയോഗിക്കുന്ന ചെറു മിസൈലുകള് വേണമെന്ന ഇന്ത്യന് കരസേനയുടെ ആവശ്യമാണ് ഇതിലൂടെ നിറവേറ്റപ്പെടുന്നത്. നിലവിലുള്ളത് മിലന് 2ടിയും കോണ്കൂര് മിസൈലുമാണ്. 300 നാഗ് മിസൈലുകളും 24 മിസൈല് വിക്ഷേപണ വാഹനങ്ങളും വാങ്ങാന് കരസേനയ്ക്ക് പ്രതിരോധ മന്ത്രാലയം അനുമതി നല്കിയിരിക്കുകയാണ്.
ഇസ്രായേല് നിര്മിതമായ സ്പൈക്ക് ടാങ്ക് വേധ മിസൈലുകള് നിലവില് ആശ്രയിക്കുന്ന ഇന്ത്യയ്ക്ക് നാഗ് സൈന്യത്തിന് കൈമാറുന്നതോടെ ഇനി അത്തരം മിസൈലുകള് ഇറക്കുമതി ചെയ്യേണ്ടി വരില്ല. ടാങ്കുകള് ആക്രമിച്ച് തകര്ക്കാന് ശേഷിയുള്ള ഇത്തരം മിസൈലുകള് കൈവശമുള്ളത് ചുരുക്കം ചില രാജ്യങ്ങള്ക്ക് മാത്രമാണ്. 524 കോടി രൂപ ചെലവിട്ടാണ് നാഗ് മിസൈലുകള് വികസിപ്പിച്ചത്.
