അന്തിക്കാട്: ബിജെപി പ്രവര്ത്തകനെ നടുറോഡില് വെച്ച് കാറില് നിന്നിറക്കി വെട്ടിക്കൊന്നു. മുറ്റിച്ചൂര് കൂട്ടാല വീട്ടില് ഉദയന്റെ മകന് നിധിന് എന്ന അപ്പു (28) വിനെയാണ് സിപിഎമ്മുകാര് ക്രൂരമായി വെട്ടിക്കൊന്നത്.
കാമുക്ക് അഞ്ചങ്ങാടി റോഡിലൂടെ കാറില് യാത്ര ചെയ്യുമ്പോഴായിരുന്നു നിധിലിന് നേരേ ആക്രമണമുണ്ടായത്. നിധിന്റെ കാറിനെ പിന്തുടര്ന്ന് മറ്റൊരു കാറിലെത്തിയ സംഘം നിധിന്റെ കാറിനെ ഇടിച്ചുതെറിപ്പിക്കുകയായിരുന്നു. കാറില് നിന്ന് പുറത്തേക്ക് വീണ നിധിലിനെ സംഘം വെട്ടിപ്പരിക്കേല്പ്പിച്ച ശേഷം കടന്നുകളഞ്ഞു.
ഗുരുതരമായി പരിക്കേറ്റ നിധിലിനെ ആശുപത്രിയിലെത്തിച്ചെങ്കിലും മരണം സംഭവിക്കുകയായിരുന്നു. ആക്രമണത്തിന് പിന്നില് സിപിഎം പ്രവര്ത്തകരാണെന്ന് ബിജെപി. മന്ത്രി എ.സി.മൊയ്തീനും നിധിന്റെ കൊലപാതകത്തില് പങ്കുണ്ടെന്നും പ്രതികളെ ഉടന് പിടികൂടണമെന്നും ബിജെപി ആവശ്യപ്പെട്ടു.
കഴിഞ്ഞ ഒരാഴ്ചയ്ക്കിടെ തൃശൂരില് നടക്കുന്ന മൂന്നാമത്തെ കൊലപാതകമാണ് ഇത്. നേരത്തെ തൃശൂര് പുതുശേരിയിലെ സിപിഎം ബ്രാഞ്ച് സെക്രട്ടറിയായ സനൂപ്, പോക്സോ കേസിലെ പ്രതിയായ സതീഷ് കുട്ടന് എന്നിവര് കൊല്ലപ്പെട്ടിരുന്നു.
