കോഴിക്കോട്: ഹാര്ബറുകള് നിരന്തരം അടച്ചിടുന്നതിനെ തുടര്ന്ന് ജീവിതം മുന്നോട്ട് കൊണ്ട് പോകാനാകാതെ മത്സ്യത്തൊഴിലാളികള് ദുരിതത്തില്. ജില്ലയിലെ പ്രധാന മത്സ്യബന്ധന കേന്ദ്രങ്ങളായ ചോമ്പാല്, കൊയിലാണ്ടി, പുതിയാപ്പ, ബേപ്പൂര്, ചാലിയം ഹാര്ബറുകള് മാസങ്ങളായി അടഞ്ഞ് കിടക്കുകയായിരുന്നു. തുറന്നിട്ട് ആഴ്ചകള്ക്കുള്ളില് തന്നെ വീണ്ടും അടച്ചത് മത്സ്യത്തൊഴിലാളികളെ ദുരിതത്തിലാഴ്ത്തിയിരുക്കുകയാണ്.
ഭൂരിഭാഗം തൊഴിലാളികളും ബാങ്കില് നിന്നും മറ്റും പണം കടമെടുത്താണ് മത്സ്യബന്ധന ഉപകരണങ്ങള് വാങ്ങിയത്. മത്സ്യക്ഷാമവും, നിരന്തരമായ അടച്ചിടല് കാരണവും ജോലിയില്ലാതായതോടെ തിരിച്ചടവ് മുടങ്ങി കടക്കെണിയിലായിരിക്കുകയാണ് ഇവര്. ചിങ്ങം, കന്നി മാസങ്ങളാണ് തൊഴിലാളികളുടെ ചാകരക്കാലം. വറുതിക്കാലത്തെ തരണം ചെയ്യുന്നതും ഈ മാസങ്ങളിലെ വരുമാനം കൊണ്ടാണ്. കോവിഡ് പശ്ചാത്തലത്തില് ജോലിക്ക് പോകാന് കഴിയാത്തത് ഏറെ ബാധിച്ചിരിക്കുകയാണ് ഈ മേഖലയിലുള്ളവരെ.
അടിയന്തര ഇടപെടല് നടത്തി ഹാര്ബറുകള് തുറന്ന് പ്രവര്ത്തിക്കാന് നടപടി സ്വീകരിക്കണമെന്ന് ഭാരതീയ മത്സ്യ പ്രവര്ത്തക സംഘം കോഴിക്കോട് ജില്ലാ സമിതി ആവശ്യപ്പെട്ടു. ക്ഷാമകാലത്ത് മത്സ്യതൊഴിലാളികള്ക്ക് സര്ക്കാര് പ്രഖ്യാപിച്ച 2000 രൂപയും ഭക്ഷ്യധാന്യ കിറ്റും പകുതി പേര്ക്ക് പോലും ലഭിച്ചിട്ടില്ല. കടക്കെണിയിലായ മത്സ്യതൊഴിലാളികള്ക്ക് അടിയന്തിര സാമ്പത്തിക സഹായം ലഭ്യമാക്കണമെന്നും സമിതി ആവശ്യപ്പെട്ടു. ജില്ല പ്രസിഡന്റ് എം. കരുണാകരന്, സെക്രട്ടറി പി.പി. മണി, വി. പ്രഹ്ളാദന്, എം.ജി. സംജാദ്, പി.പി. വിനായകന്, സുധീര് പൂഴിത്തല, വി. പ്രജോഷ് എന്നിവര് സംസാരിച്ചു.
