പറവൂര്: വടക്കേക്കര പഞ്ചായത്തിലെ 2012 – 15കാലഘട്ടത്തിലെ സിപിഎമ്മിന്റെ അഴിമതിക്കെതിരെ അന്വേഷണം വേണമെന്നാവശ്യം ശക്തം. ഇത് സംബന്ധിച്ചു നടന്ന പ്രാഥമിക അന്വേഷണങ്ങളില് അഴിമതിയാരോപണങ്ങള് ശരിവയ്ക്കുന്ന റിപ്പോര്ട്ടുകളാണ് പുറത്തുവരുന്നത്.
വടക്കേക്കര പഞ്ചായത്തില് സിപിഎം നിയന്ത്രണത്തിലാണ് ഭരണം. സിഡിഎസിന്റെ ചുമതല സിപിഎം വനിതകള്ക്കായിരുന്നു. മൂന്നു ലക്ഷത്തില്പരം രൂപ ബാങ്കില് നിന്നു പിന്വലിച്ചത് സിഡിഎസ് കണക്കില് വരവു വച്ചിട്ടില്ലെന്നും ഈ പണം കൈയിലിരിക്കെ ജില്ലാ മിഷനില് നിന്ന് വീണ്ടും പണം വാങ്ങിയതായുമാണ് വിവരം. അഴിമതി പുറത്തു വന്നതോടെ അസി: സെക്രട്ടറിയെ അന്വേഷണത്തിനായി പഞ്ചായത്ത് ചുമതലപ്പെടുത്തി. അന്വേഷണത്തില് ഇക്കാര്യം തെളിഞ്ഞതോടെ സിപിഎം അസി. സെക്രട്ടറിയെ സ്ഥലം മാറ്റി. സിഡിഎസ് ചെയര്പെഴ്ണായിരുന്നയാളെ 2015ലെ തദ്ദേശ തെരഞ്ഞെടുപ്പില് മത്സരിപ്പിച്ചു വിജയിപ്പിക്കുകയും ചെയ്തു.
തുടര്ന്ന് അന്വേഷണമോ നടപടികളോയെടുക്കാന് സിപിഎം പഞ്ചായത്ത് ഭരണസമതി തയാറാകുന്നില്ലെന്ന് പ്രതിപക്ഷ അംഗങ്ങള് ചൂണ്ടിക്കാണിച്ചു. ജില്ലാ മിഷനില് നിന്ന് റിപ്പോര്ട്ട് വന്നിട്ടില്ലെന്നാണ് ഭരണകക്ഷിക്കാര് പറഞ്ഞിരുന്നത്. എന്നാല്, ജില്ലാ മിഷന് അസി: സെക്രട്ടറിയുടെ അന്വേഷണ റിപ്പോര്ട്ട് സാധൂക്കരിക്കാവുന്നതാണെന്നു പറയുന്ന റിപ്പോര്ട്ട് കഴിഞ്ഞ ജൂലൈ മാസത്തില് പഞ്ചായത്തിന് നല്കിയെങ്കിലും നടപടിയൊന്നും സ്വീകരിക്കാന് പഞ്ചായത്ത് ഭരണസമിതി തയാറായിട്ടില്ല. ജനങ്ങളുടെ പണം കൊള്ളയടിച്ചവര്ക്കെതിരെ അടിയന്തര നടപടി സ്വീകരിക്കണമെന്നാണ് പഞ്ചായത്ത് നിവാസികളുടെയും ആവശ്യം.
