സ്ഥിതി ഗുരുതരം, ആശങ്കയോടെ ആരോഗ്യ വകുപ്പ്

തൃശൂര്‍: ജില്ലയില്‍ സമ്പര്‍ക്കം വഴിയുള്ള രോഗബാധയേറുന്നു. നിര്‍ദ്ദേശങ്ങള്‍ പാലിക്കുന്നതില്‍ കാണിക്കുന്ന ഉദാസീനതയാണ് സമ്പര്‍ക്ക രോഗബാധ നിരക്ക് ഉയരാന്‍ കാരണമെന്ന് ആരോഗ്യ വകുപ്പ്. സമൂഹ വ്യാപനം നടക്കുന്നതായി കണക്കുകള്‍ വ്യക്തമാക്കുന്നു. സ്ഥിതി അതിഗുരുതരമാണ്. നിയന്ത്രണങ്ങള്‍ കര്‍ശനമായി പാലിച്ചില്ലെങ്കില്‍ വന്‍ വിപത്താകും സംഭവിക്കുകയെന്നും ആരോഗ്യ വകുപ്പ് അധികൃതര്‍ പറഞ്ഞു. ആവര്‍ത്തിച്ച് പറഞ്ഞിട്ടും ഒരു നിയന്ത്രണവുമില്ലാതെ പൊതുസ്ഥലങ്ങളില്‍ പോലും ആളുകള്‍ കൂട്ടം കൂടുകയാണ്. മാസ്‌കും കയ്യുറകളും സാനിറ്റൈസറും പോലും കൃത്യമായി ഉപയോഗിക്കുന്നില്ല.  

ജില്ലയില്‍  129 പേര്‍ക്ക് കൂടി രോഗം സ്ഥിരീകരിച്ചു. ഇതില്‍ 128 പേര്‍ക്കും രോഗബാധയുണ്ടായത് സമ്പര്‍ക്കം വഴിയാണ്. ജില്ലയില്‍ രോഗബാധിതരായി ഇപ്പോള്‍ ചികിത്സയില്‍ കഴിയുന്നവരുടെ എണ്ണം 1520 ആണ്. തൃശൂര്‍ സ്വദേശികളായ 33 പേര്‍ മറ്റു ജില്ലകളില്‍ ചികിത്സയില്‍ കഴിയുന്നുണ്ട്.  ഇന്നലെ ക്ലസ്റ്ററുകള്‍ വഴിയുള്ള രോഗബാധ ഇപ്രകാരം. ദയ ക്ലസ്റ്റര്‍ 7, എലൈറ്റ് ക്ലസ്റ്റര്‍ 5, അഴീക്കോട് ഹാര്‍ബര്‍ ക്ലസ്റ്റര്‍ 5, ജൂബിലി മിഷന്‍ ക്ലസ്റ്റര്‍ 2, സ്പിന്നിങ് മില്‍ ക്ലസ്റ്റര്‍ 2, ഐസിഐസിഐ ബാങ്ക് ക്ലസ്റ്റര്‍ 1, മറ്റ് സമ്പര്‍ക്ക കേസുകള്‍ 101 ആരോഗ്യ പ്രവര്‍ത്തകര്‍-4, ഫ്രണ്ട് ലൈന്‍ വര്‍ക്കര്‍-1. വിദേശത്തുനിന്ന് വന്ന ഒരാള്‍ക്കും കോവിഡ് സ്ഥിരീകരിച്ചു. ഇതില്‍ 60 വയസ്സിന് മുകളിലുള്ള 13 പുരുഷന്‍മാരും 6 സ്ത്രീകളും 10 വയസ്സിന് താഴെയുള്ള 6 ആണ്‍കുട്ടികളും 4 പെണ്‍കുട്ടികളും ഉള്‍പ്പെടുന്നു.

ചാലക്കുടിയില്‍ ഫസ്റ്റ് ലൈന്‍ ട്രീറ്റ്‌മെന്റ് സെന്റര്‍ ആരംഭിച്ചു

സെന്റ് ജെയിംസ് അക്കാദമിയില്‍  ഫസ്റ്റ് ലൈന്‍ ട്രീറ്റ്‌മെന്റ് സെന്റര്‍ പ്രവര്‍ത്തനമാരംഭിച്ചു. ചാലക്കുടി നഗരസഭയും ആരോഗ്യവകുപ്പും എന്‍എച്ച്എമ്മും സംയുക്തമായി സൗകര്യങ്ങളൊരുക്കിയാണ് ഫസ്റ്റ് ലൈന്‍ ട്രീറ്റ്‌മെന്റ് സെന്റര്‍ ആരംഭിച്ചിട്ടുള്ളത്. ഇതു കൂടാതെ ആരോഗ്യവകുപ്പിലെ ആയൂര്‍വേദം, ഹോമിയോ ഉള്‍പ്പെടെ ഡോക്ടര്‍മാരുടെ സേവനം ലഭ്യമാക്കും.  210 രോഗികള്‍ക്കുള്ള സ്വകര്യമാണ് ഇവിടെ ഒരുക്കിയിരിക്കുന്നത്.  

ആരോഗ്യ വകുപ്പുമായി ബന്ധപ്പെടണം

കാഞ്ഞാണി മാര്‍ക്കറ്റില്‍ കൊറോണ സ്ഥിരീകരിച്ചതിനെ തുടര്‍ന്ന്  നാല് മുതല്‍ ഏഴ് വരെ കാഞ്ഞാണി മാര്‍ക്കറ്റിലുള്ള ഷണ്‍മുഖ സലൂണ്‍ സന്ദര്‍ശിച്ചവര്‍ മണലൂര്‍ ആരോഗ്യ വകുപ്പുമായി ബന്ധപ്പെടണമെന്ന് ഹെല്‍ത്ത് ഇന്‍സ്‌പെക്ടര്‍ അറിയിച്ചു.ബന്ധപ്പെടേണ്ട നമ്പര്‍: 949542 2602, 9387879911,9387 127148.

കൊടുങ്ങല്ലൂര്‍: ചന്തപ്പുരയില്‍ പ്രവര്‍ത്തിക്കുന്ന ആര്‍ആര്‍ മെഡിക്കല്‍സിലെ ജീവനക്കാര്‍ക്ക് കൊറോണ സ്ഥിരീകരിച്ചു. ഈ സാഹചര്യത്തില്‍ ആഗസ്റ്റ് 9 മുതല്‍ 5 വരെ അവിടം സന്ദര്‍ശിച്ചിട്ടുള്ളവര്‍ വിവരമറിയിക്കണമെന്ന് ആരോഗ്യ വകുപ്പ് അധികൃതര്‍ അറിയിച്ചു.