തിരുവനന്തപുരം : സംസ്ഥാനത്ത് കനത്ത മഴ തുടരുന്നു. അടുത്ത മൂന്നു ദിവസത്തേക്ക് കൂടി ശക്തമായ മഴ തുടരും. എല്ലാ ജില്ലകളിലും യെല്ലോ അലർട്ട് പ്രഖ്യാപിച്ചു. അറബിക്കടലിൽ രുപം കൊണ്ട ന്യൂനമർദ്ദത്തിന്റെ ഫലമായാണ് കഴിഞ്ഞ നാല് ദിവസമായി മഴ പെയ്യുന്നത്.
പല ഇടങ്ങളിലും നാശനഷ്ടങ്ങൾ റിപ്പോർട്ട് ചെയ്തിട്ടുണ്ട്. അറബിക്കടലില്‍ രൂപം കൊണ്ട ന്യൂനമര്‍ദം ദുര്‍ബലമായെങ്കിലും കേരളത്തില്‍ കാലവര്‍ഷത്തിന്റെ ഭാഗമായ മഴ വെള്ളിയാഴ്ച വരെ തുടരും. ഒറ്റപ്പെട്ട സ്ഥലങ്ങളില്‍ ബുധനാഴ്ചയും ശനിയാഴ്ചയും കനത്ത മഴയ്‌ക്കു സാധ്യതയുണ്ട്.
24 മണിക്കൂറിനുള്ളില്‍ 11 സെന്‍റീമീറ്റര്‍ വരെയുള്ള അതിശക്തമായ മഴയ്‌ക്കാണ് ഇവിടങ്ങളില്‍ സാധ്യത. വ്യാഴം, വെള്ളി ദിവസങ്ങളില്‍ ഒറ്റപ്പെട്ട സ്ഥലങ്ങളില്‍ കനത്തതോ അത്യന്തം കനത്തതോ ആയ മഴയ്‌ക്കും സാധ്യതയുണ്ട്.
കേരള, കര്‍ണാട തീരത്തും ലക്ഷദ്വീപ് ഭാഗത്തും മണിക്കൂറില്‍ 45 മുതല്‍ 55 കിലോമീറ്റര്‍ വരെ വേഗത്തില്‍ കാറ്റു വീശാന്‍ സാധ്യതയുള്ളതിനാല്‍ മത്സ്യത്തൊഴിലാളികള്‍ കടലില്‍ പോകരുതെന്നും കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പില്‍ പറയുന്നു.
