ആലപ്പുഴ: മഴക്കെടുതിയെതുടര്ന്ന് കുട്ടനാട്, ചേര്ത്തല, ചെങ്ങന്നൂര് താലൂക്കുകളിലാണ് ദുരിതാശ്വാസ ക്യാമ്പുകള് ആരംഭിച്ചിട്ടുള്ളത്. ആകെ നാലു ക്യാമ്പുകളിലായി 77 പേരാണുള്ളത്. പമ്പയില് ജലനിരപ്പ് ഉയര്ന്നതിനെ തുടര്ന്ന് ചെങ്ങന്നൂര് താലൂക്കില് മിത്രപ്പുഴ പാലത്തിന്റെ താഴെ താമസിച്ചിരുന്ന മൂന്നു കുടുംബങ്ങളെ കീച്ചേരിമേല് ജെബിഎസ് സ്കൂള് ആരംഭിച്ച ക്യാമ്പിലേക്ക് മാറ്റിപ്പാര്പ്പിച്ചിട്ടുണ്ട്. 14 പേരാണ് ഇവിടെയുള്ളത്. എണ്ണയ്ക്കാട് വില്ലേജില് അഞ്ചു കുടുംബങ്ങളിലെ 22 പേരെ പകല്വീട് ക്യാമ്പിലേക്ക് മാറ്റിപ്പാര്പ്പിച്ചിട്ടുണ്ട്. പാണ്ടനാട് മിത്രമഠം പാലത്തിന്റെ അടിയില് താമസിച്ചിരുന്ന രണ്ടു കുടുംബത്തെ ബന്ധുവീട്ടിലേക്ക് മാറ്റി താമസിപ്പിച്ചിട്ടുണ്ട്.
കരട്ടിശ്ശേരി വില്ലേജിലെ വിയപുരത്തോട് ചേര്ന്നുള്ള ഭാഗങ്ങളില് ജല നിരപ്പ് ഉയര്ന്നതിനെ തുടര്ന്ന് ഇവിടുത്തെ ജനങ്ങളുടെ ആവശ്യ പ്രകാരം ഇവര്ക്ക് മുക്കാത്താരി രണ്ടാം വാര്ഡില് കഞ്ഞി വീഴ്ത്തല് കേന്ദ്രം ആരംഭിക്കും. 40 കുടുംബങ്ങളിലായി 165 ഓളം ആളുകളാണ് ഇവിടെയുള്ളത്, ഇവരെ ക്യാമ്പുകളിലേക്ക് മാറ്റുന്നതിന് മാന്നാര് നായര് സമാജം സ്കൂള് സജ്ജമാക്കിയിട്ടുണ്ട്. കുട്ടനാട് താലൂക്കില് കാവാലം വാര്ഡ് നമ്പര് 4 കമ്യൂണിറ്റി ഹാളില് ഒരുകുടുംബത്തിലെ അഞ്ചുപേരും ചേര്ത്തല നോര്ത്ത് വില്ലേജിലെ കഞ്ഞികാട്ട് കമ്മ്യൂണിറ്റി ഹാളില് പത്തുകുടുംബങ്ങളിലെ 36 പേരും ആണ് ഉള്ളത.്
