പൈപ്പ് പൊട്ടി കുടിവെള്ളം പാഴാകുന്നു

ചെറുതോണി: ജലവിതരണ വകുപ്പിന്റെ പൈപ്പ് പൊട്ടി ചെറുതോണിയിൽ ദിവസവും പാഴാകുന്നത് ആയിരക്കണക്കിന് ലിറ്റർ വെള്ളം. കഴിഞ്ഞ ഒരാഴ്ചയിലധികമായി ഈ സ്ഥിതി തുടരുമ്പോഴും അധികൃതർ പൈപ്പ് നന്നാക്കാൻ തയ്യാറായിട്ടില്ല. പൈനാവിലെ വാട്ടർ ടാങ്കിലേക്ക് പമ്പു ചെയ്യുന്ന വെള്ളമാണ് ഈ പ്രധാന പൈപ്പ് ലൈൻ വഴി ജില്ലാ ആസ്ഥാനത്തും പരിസര പ്രദേശങ്ങളിലുമുള്ള വീടുകളിലേക്കും, കെഎസ് ഇ ബി ക്വാർട്ടേഴ്സുകളിലേക്കും, വ്യാപാര സ്ഥാപനങ്ങളിലേക്കും എത്തുന്നത്. ചെറുതോണി പെട്രോൾ പമ്പിന് സമീപത്ത് നിന്നും നൂറ് മീറ്റർ മാറി വഴിയരികിലാണ് പൈപ്പ് പൊട്ടി റോഡിലൂടെ ആഴ്ചകളായി കുടിവെള്ളം ഒഴുകി പാഴാകുന്നത്. പൈപ്പ് നന്നാക്കാൻ അടിയന്തര നടപടി സ്വീകരിക്കാൻ ജലവിതരണ വകുപ്പ്‌ തയ്യാറാകുന്നമെന്നാണ് നാട്ടുകാരുടെ ആവശ്യം.