അടിമാലി: ദേവികുളം താലൂക്കിലെ 60 ഓളം വനവാസി കുടികളിലെ 300 ഓളം കുട്ടികള്‍ക്ക് പാഠ പുസ്തകമെത്തിച്ച് നല്‍കി ജനമൈത്രി എക്സൈസ്. കുടികളിലെ കുട്ടികളുടെ വിദ്യാഭ്യാസത്തിന് സഹായകരമാകുന്നതിനു വേണ്ടി ട്രൈബല്‍ വകുപ്പുമായി സഹകരിച്ച് കഴിഞ്ഞ 2 ആഴ്ച കൊണ്ടാണ് പുസ്തകങ്ങള്‍ എത്തിച്ച് നല്‍കിയത്.
മീന്‍കുത്തിക്കുടി (ഇടമലക്കുടി) കുറത്തിക്കുടി, മറയൂര്‍, കാന്തല്ലൂര്‍, ചിന്നാര്‍, വട്ടവട, ചിന്നക്കനാല്‍, മാങ്കുളം, ആനക്കുളം അടിമാലി തുടങ്ങിയ പ്രദേശങ്ങളിലെ കുടികളിലെ കുട്ടികള്‍ക്ക്, പാലക്കാട്, കോട്ടയം, ഏറ്റുമാനൂര്‍, തൊടുപുഴ, കോതമംഗലം, പൈനാവ് തുടങ്ങിയ സ്ഥലങ്ങളിലെ ഹോസ്റ്റലുകളില്‍ നിന്നും, സ്‌കൂളുകളില്‍ നിന്നും, പുസ്തകങ്ങള്‍ ശേഖരിച്ചാണ് വിതരണം നടത്തിയത്.
കുടികളില്‍ തന്നെ ക്ലാസുകള്‍ നല്‍കുന്നതിന് ആവശ്യമായ ക്രമീകരണം നടത്തുന്നതിന് വിവിധ വകുപ്പുകളുടെ സഹായം ജനമൈത്രി എക്സൈസ് അഭ്യര്‍ത്ഥിച്ചിട്ടുണ്ട്.
അത്തരം ക്ലാസുകള്‍ക്ക് പുസ്തകം അനിവാര്യമാണെന്ന് ബോധ്യമായതിനാലാണ് ജനമൈത്രി എക്സൈസ് ദ്രുതഗതിയില്‍ പുസ്തക വിതരണം നടത്തുന്നത്. കൊറോണ വൈറസ് വ്യാപനത്തിന്റെ ഭാഗമായി യാത്രാ സൗകര്യങ്ങളും മറ്റും അപര്യാപ്തമായ ഇടമലക്കുടി, കുറത്തിക്കുടി, മറയൂര്‍, കാന്തല്ലൂര്‍, ചിന്നാര്‍, വട്ടവട എന്നീ പ്രദേശങ്ങളിലെ കുട്ടികള്‍ക്ക് സ്‌കൂളിലെത്തി പാഠപുസ്തകങ്ങള്‍ കൈപ്പറ്റുന്നതിന് മുമ്പ് സാധിച്ചിരുന്നില്ല. ജനമൈത്രി എക്സൈസ് സര്‍ക്കിള്‍ ഇന്‍സ്‌പെക്ടര്‍ സി.കെ. സുനില്‍രാജ്, ഓഫീസര്‍മാരായ അഷറഫ് കെ.എം, സജീവ് ആര്‍ തുടങ്ങിയവര്‍ ചേര്‍ന്നാണ് പുസ്തകങ്ങള്‍ വിതരണം ചെയ്തത്.
.
