കാസര്കോട്: സ്വര്ണക്കടത്തില് മുഖ്യമന്ത്രിയുടെ മനസാക്ഷി സൂക്ഷിപ്പുകാരുടെ പങ്ക് വ്യക്തമായതോടെ തെളിവുകള് നശിപ്പിക്കാന് അണിയറയില് നീക്കങ്ങള് ശക്തമാണെന്ന് ബിജെപി ജില്ലാ പ്രസിഡണ്ട് അഡ്വ കെ.ശ്രീകാന്ത് ആരോപിച്ചു.
സ്വര്ണക്കടത്ത് കേസില് മുഖ്യമന്ത്രിയുടെ രാജി ആവശ്യപ്പെട്ട് ബിജെപി സംസ്ഥാന തലത്തില് നടക്കുന്ന പോസ്റ്റ് കാര്ഡ് ക്യാമ്പയിന്റെ ഭാഗമായി കാസര്കോട് ഹെഡ് പോസ്റ്റ് ഓഫീസ് പരിസരത്ത് ബിജെപി സംഘടിപ്പിച്ച ജില്ലാതല പരിപാടി ഉദ്ഘാടനം ചെയ്യുകയായിരുന്നു അദ്ദേഹം. മുഖ്യമന്ത്രിയുടെ ഓഫീസ് സ്വര്ണ്ണ കള്ളക്കടത്തുകാര്ക്ക് തീറെഴുതി കൊടുത്തു.
സി.സി ടിവി ദൃശ്യങ്ങള് നശിപ്പിക്കാനുള്ള നീക്കത്തിന്റെ ഭാഗമായാണ് ഇടിമിന്നലില് കഥകള് മെനയുന്നത്. സ്വര്ണക്കടത്തിലെ ഭീകരവാദ ബന്ധം രാജ്യത്തിന്റെ ഐക്യത്തെ തകര്ക്കാനുള്ള നീക്കത്തിന്റെ ഭാഗമാണ്. പിണറായി വിജയന് മുഖ്യമന്ത്രിയായി തുടരുന്നത് പ്രതികള്ക്ക് രക്ഷപ്പെടാനുള്ള സാഹചര്യമൊരുക്കും.
ആയതിനാല് തല്സ്ഥാനം രാജിവെച്ച് അന്വേഷണം നേരിടാന് മുഖ്യമന്ത്രി പിണറായി വിജയന് തയ്യാറാവണമെന്ന് ശ്രീകാന്ത് ആവശ്യപ്പെട്ടു. ബിജെപി ജില്ലാ വൈസ് പ്രസിഡണ്ട് അഡ്വ. സദാനന്ദ റൈ, ജില്ലാ സെക്രട്ടറി എന്.സതീഷ് എന്നിവര് സംബന്ധിച്ചു.
