അടിമാലി: തമിഴ്നാട്ടില് നിന്ന് എത്തുന്നവര്‍ക്കായി ഏര്‍പ്പെടുത്തിയ പ്രതിദിന പാസ് സംവിധാനം ഇടുക്കിയില്‍ കൊറോണ വ്യാപനത്തിന് ഇടയാക്കിയതായി ആരോപണം. പാസില്‍ എത്തിയ പലരും ജില്ല വിട്ട് പോയില്ല. ആയിരക്കണക്കിന് ആളുകളാണ് ഇങ്ങനെ സമാന്തര പാതകള്‍ വഴിയും തോട്ടം മേഖലയില്‍ എത്തിയത്.
ഇടുക്കി ജില്ലയിലെ തോട്ടം, കാര്‍ഷിക മേഖലകളില്‍ കൊറോണ വ്യാപനത്തിന്റെ പ്രധാന കാരണം പാസ് സംവിധാനമാണെന്ന ആരോപണം ശക്തമാവുകയാണ്. യാതൊരു പരിശോധനയുമില്ലാതെ ആയിരക്കണക്കിന് ആളുകളാണ് ഹൈറേഞ്ചിലെ തോട്ടം മേഖലയിലേക്ക് ഇത്തരത്തില്‍ എത്തിയത്. ഏലത്തോട്ടം മേഖലകളില്‍ വിളവെടുപ്പുകാലം ആരംഭിച്ചതിനാല്‍ തൊഴിലാളി ക്ഷാമം രൂക്ഷമാക്കിയിരുന്നു. തേനി, ബോഡി, ബോഡി നായ്‌ക്കന്നൂര്‍, കമ്പം മേഖലകളില്‍ നിന്നും ദൈനം ദിനം ആയിരക്കണക്കിനു സ്ത്രീ തൊഴിലാളികളടക്കം തോട്ടം ജോലിയ്‌ക്കായി എത്തിക്കൊണ്ടിരുന്നത്.
രാവിലെ വിവിധ തോട്ടങ്ങളില്‍ ഇവരെ എത്തിയ്‌ക്കുന്നതിനായി നൂറുകണക്കിന് ചെറുവാഹനങ്ങള്‍ അതിര്‍ത്തി കടന്നു വരുന്നതായിരുന്നു പതിവ്. എന്നാല്‍ ലോക്ക് ഡൗണ്‍ കാലത്തെ കര്‍ശന നിയന്ത്രണം ഇവരുടെ യാത്രയ്‌ക്ക് പൂട്ടിട്ടിരുന്നു. എന്നാല്‍ കുറെ നാളുകളായി പരിശോധനാമമാത്രമായതും, പാസിന്റെ മറവിലും നിരവധി പേര്‍ അതിര്‍ത്തി കടന്നു. ഇവര്‍ക്ക് തോട്ടമുടമകള്‍ താമസ സൗകര്യമൊരുക്കിക്കൊടുത്തതായി ആക്ഷേപമുയരുന്നത്. ഇതോടെ അതിര്‍ത്തി ഗ്രാമങ്ങളും, അനുബന്ധ മേഖലകളും കൊറോണ ഭീഷണിയുടെ നിഴലിലായി. തമിഴ്നാട്ടില് ഏറ്റവും കൂടുതല്‍ കൊറോണ രോഗികളുള്ള പ്രദേശങ്ങളില്‍ പെടുന്ന നഗരങ്ങളാണ് തേനിയും, ബോഡിയും എന്നത് ആശങ്ക വര്‍ദ്ധിപ്പിക്കുകയാണ്. അതിര്‍ത്തി മേഖലയിലെ താത്കാലിക ചെക്ക് പോസ്റ്റുകള്‍ നിലവില്‍ പരിശോധനയില്ല. കമ്പം, ബോഡി മേഖലകള്‍ കേന്ദ്രീകരിച്ച് പ്രവര്‍ത്തിക്കുന്ന ചില കര്‍ഷക സംഘടനകളുടെ ആളുകളെ വ്യാപകമായി ജില്ലയിലേയ്‌ക്ക് കടത്തി വിടുന്നതായും ആരോപണം ഉണ്ട്.
ഒരുദിവസ പാസിലും അതിര്‍ത്തിയിലൂടെ അനധികൃതമായി എത്തുന്നവരും തൊട്ടടുത്ത ദിവസം തന്നെ തോട്ടം ജോലികള്‍ക്ക് ഇറങ്ങുകയാണ് ചെയ്യുന്നത്. ജില്ലയിലെ ഉറവിടം അറിയാത്ത കൊറോണ കേസുകള്‍ക്ക് വഴി തെളിച്ചത് ഈ സാഹചര്യമാണെന്നാണ് ആരോപണം. നിലവില്‍ രാജാക്കാട് മേഖലയിലാണ് കൂടതലായി ഉറവിടം അറിയാത്ത കൊറോണ പോസിറ്റീവ് കേസുകള്‍ റിപ്പോര്‍ട്ട് ചെയ്തിരിക്കുന്നത്. മറ്റ് തോട്ടം മേഖലകളിലും ഇതേ സാഹചര്യം നിലനില്‍ക്കുന്നുണ്ടോ എന്ന ആശങ്കയാണ് നിലവിലുള്ളത്.
