പെരുമ്പാവൂര്‍: വഴിയാത്രക്കാരന്റെ കാലിലൂടെ സ്‌കൂട്ടര്‍ കയറ്റി ഇറക്കിയത് ചോദ്യം ചെയ്ത യുവാവിനെ കത്തിയെടുത്ത് കുത്തിക്കൊലപ്പെടുത്താന്‍ ശ്രമിച്ച് എസ്എഫ്‌ഐ നേതാവ്. നഗരത്തിലെ പട്ടാലില്‍ പെട്രോള്‍ പമ്പില്‍ ഇന്നലെ രാത്രിയാണ് സംഭവം. കത്തിക്കുത്ത് നടത്തിയ പാറപ്പുറം സ്വദേശി സഞ്ചുവിനെ നാട്ടുകാര്‍ പിടികൂടി പോലിസില്‍ ഏല്‍പിച്ചു.
പമ്പില്‍ പെട്രോള്‍ അടിക്കാനെത്തിയ കാവുംപുറം സ്വദേശി ജ്യോറിസിന്റെ കാലിലൂടെ സഞ്ചു സ്‌കൂട്ടര്‍ കയറിയിറങ്ങിയതിനെ തുടര്‍ന്നുണ്ടായ വാക്കേറ്റമാണ് കത്തികുത്തില്‍ കലാശിച്ചത്. എസ്എഫ്‌ഐ നേതാവായിരുന്ന പ്രതി കയ്യില്‍ കരുതിയ കത്തി എടുത്ത് ജ്യോറിസിനെ കുത്തുകയായിരുന്നു. ജ്യോറിസിന്റെ വയറിന്റെ ഇടതുഭാഗത്ത് പരിക്കേറ്റതിനെത്തുടര്‍ന്ന് പെരുമ്പാവൂര്‍ താലൂക്കാശുപത്രിയില്‍ പ്രവേശിപ്പിച്ചു. ഇയാള്‍ ഗുരുതരാവസ്ഥയിലാണ്.
