പന്തീരാങ്കാവ്: ഒളവണ്ണ പഞ്ചായത്തില്‍ വിദ്യാഭ്യാസ മേഖലയായി പ്രഖ്യാപിച്ച 6, 10 വാര്‍ഡുകളില്‍ വീടു നിര്‍മാണത്തിനും ബാങ്ക് വായ്പയ്‌ക്കുമടക്കമുള്ള നിയന്ത്രണങ്ങള്‍ ഉടന്‍ പിന്‍വലിക്കണമെന്ന് ബിജെപി സംസ്ഥാന സെക്രട്ടറി അഡ്വ. കെ.പി. പ്രകാശ്ബാബു ആവശ്യപ്പെട്ടു.
ജനവാസ മേഖല വിദ്യാഭ്യാസ മേഖലയായി പ്രഖ്യാപിച്ച് നിര്‍മാണ പ്രവര്‍ത്തനങ്ങള്‍ക്ക് നിയന്ത്രണമേര്‍പ്പെടുത്തിയ പഞ്ചായത്ത് നടപടിക്കെതിരെ പള്ളിപ്പുറത്ത് ബിജെപി നടത്തിയ പ്രതിഷേധ ധര്‍ണ ഉദ്ഘാടനം ചെയ്യുകയായിരുന്നു അദ്ദേഹം. പഞ്ചായത്തിന്റെ പല ഭാഗത്തും ജനവാസമില്ലാത്ത പ്രദേശങ്ങളുണ്ടെന്നിരിക്കെ ഭൂമാഫിയകളുടെ താല്‍പര്യം സംരക്ഷിക്കാനുള്ള പഞ്ചായത്തിന്റെ ശ്രമത്തെ ചെറുത്തു തോല്‍പ്പിക്കുമെന്നും അദ്ദേഹം പറഞ്ഞു.
ജനങ്ങളുടെ ജീവിക്കാനുള്ള അവകാശം കവര്‍ന്നെടുത്ത് ഭൂമാഫിയകള്‍ക്ക് പ്രദേശത്തെ തീറെഴുതിക്കൊടുക്കുന്ന പഞ്ചായത്തിന്റെ നടപടിക്കെതിരെ ജൂലൈ ഒന്നിന് പഞ്ചായത്ത് ഓഫീസിന് മുന്നില്‍ പ്രതിഷേധ ധര്‍ണ സംഘടിപ്പിക്കുമെന്നും അദ്ദേഹം പറഞ്ഞു. കെ. മനോഹരന്‍ അധ്യക്ഷനായി. ബിജെപി മണ്ഡലം പ്രസിഡന്റ് കെ. നിത്യാനന്ദന്‍, മഞ്ജുനാഥ്, നിധീഷ്, കെ.പി. സേതുമാധവന്‍, നിജുലാല്‍, ധനേഷ്, ദാസന്‍ എന്നിവര്‍ സംസാരിച്ചു.
പ്രതികരിക്കാൻ ഇവിടെ എഴുതുക: